"Ekonomia Itunaren Batzorde Mistoak akordio oso garrantzitsua lortu du gaur euskal erakundeek nazioarteko foro fiskaletan parte har dezaten eta hainbat zergatan arau-ahalmenak handitzera begira. Akordio horri esker, euskal zergadunen kudeaketak sinplifikatu ahal izango dira 14 zergatan, EAJ-PNVk eta PSOEk inbestidura-akordioan adostu zutena betez. Nahiz eta Madrilen kaosa ematen ari den arren, EAJ-PNVk akordioak aurrera ateratzen jarraitzen du". Horrela laburbildu du Aitor Esteban Euskal Taldeko bozeramaileak Ekonomia Itunaren Batzorde Mistoan gaur Eusko Jaurlaritzak eta Espainiako Gobernuak hitzemandako akordioa.

 Hain zuzen ere, Andoni Ortuzar EBBren buruak eta Pedro Sanchez Espainiako Gobernuko presidente eta PSOEko idazkari nagusiak iazko azaroaren 10ean sinatutako itunaren 3.1, 3.2 eta 3.3 puntuak betetzen dira. Horrela, euskal erakundeek Europar Batasuneko Ekonomia eta Finantza Gaietarako Kontseiluko (ECOFIN) organoetan eta Ekonomia Lankidetza eta Garapenerako Erakundearen (ELGA) fiskalitateari buruzko nazioarteko foroetan duten partaidetza handitzea erabaki da.

Halaber Ekonomia Ituna aldatzea erabaki da, foru-ogasunek kudeatzen dituzten 14 zerga arautzeko ahalmena handitzeko. Estebanen esanetan, horrek aukera emango die euskal erakundeei "euskal herritarrei izapideak eta kudeaketak errazteko". Era berean, ez-egoiliarraren errenta araudi autonomoko zerga itundua izango da kasu guztietan. Horrela, Euskadiko errentaren eta ondarearen gaineko zerga orokor guztiak Batzar Nagusiek beren alderdi guztietan onartutako arauen arabera arautuko dira.

Azkenik, gobernu biek konpromisoa hartu dute Ekonomia Itunaren Batzorde Mistoaren beste bilera bat egiteko, multinazional handien gaineko zergari buruzko lege-proiektuaren tramitazioa amaitzen denean, zerga hori Itunean sartzeko.