Iñigo Ansola, Bizkai Buru Batzarreko presidentea, Ane Támara burukidea, EAJ-PNVko beste ordezkari batzuekin batera, eta dozenaka alderdikide izan dira gaur goizean Agirre Lehendakariari egin ohi zaion lore eskaintzan, Ertzilla kalean haren omenez eraikitako eskulturaren ondoan. EAJ-PNV Bilbaok urtero antolatzen duen ekitaldi hau, eta ondoren Artxandara egiten den igoera, Gogorak, Bilboko Udalak, elkarte eta fundazio historikoek eta talde memorialistek antolatzen duten gudari, miliziano eta Gerra Zibileko emakumeei egingo zaien omenaldiaren hitzaurrea da. Ekitaldiak bat egiten du Bilbo defendatzeko borroken urteurrenarekin, eta altxatutako bandoaren aurka eta demokraziaren alde borrokatu zirenak ohoratzea du helburu.

Lore-eskaintza sinboliko honen bidez, EAJ-PNVk bere sorrerako printzipioekiko konpromiso irmoa berretsi nahi izan du, Agirre lehendakariaren irudian gorpuztuta: uste humanista sakonak dituen gizona, demokrazia plural, inklusibo eta etiko baten defendatzaile nekaezina, errespetuaren, elkartasunaren eta bizikidetzaren balioek gidatutako herrialde batean itxaropena bizirik mantentzen jakin zuena. Haren ondare moral eta politikoa, balio horietan oinarritua, konpromiso bat da gaur egun, gero eta ziurgabetasun demokratiko handiagoa dagoen garaian, are garrantzi eta gaurkotasun handiagoa hartzen duena.

Eskaintza egin ondoren, talde handia Salbeko zubira joan da, Pikotamendik Artxandara igotzen hasteko, ikurrinak zeramatzaten dozenaka jarraitzaile eta militante bildu dituen martxa herrikoi batean. Jai giroa izan da, baina baita aldarrikapen sakona ere, konpromisoaren eta herritarren batasunaren adibide.

Behin ‘Aterpe 1936-La Huella’ eskulturaren inguruan, taldeak omenaldi ofizialean parte hartu du. Bertan, Euzkadiko Gobernuaren agindupean demokrazia defendatu zuten gudariak, milizianoak eta emakumeak gogoratu dira, Gerra Zibilean inposaketaren aurrean, “faxismoaren aurka, demokraziaren eta askatasunaren alde” borrokatuz. Urteroko ekitaldi honen helburua balio humanistak eta giza eskubideak defendatu zituztenen memoria aldarrikatzea da, horiek baitira Agirre Lehendakariak berak bultzatutako proiektuaren funtsezko sustraiak, gaur egun EAJ-PNVren konpromiso politiko eta etikoan erabat indarrean jarraitzen dutenak.

‘Aterpe 1936-La Huella’ eskulturaren itzalean egindako omenaldian, Iñigo Ansolarekin, Ane Támara, Xabier Zubiaur eta Leire Urtasun, BBBren burukideak, Maitane Ipiñazar, Euzkadi Buru Batzarreko Idazkaria, eta Ion Gambra, aberri-exekutibako burukidea izan dira. Imanol Pradales Lehendakariak, Ibone Bengoetxea lehendakariorde eta Kultura eta Hizkuntza Politikako sailburuak, Elixabete Etxanobe Bizkaiko ahaldun nagusiak, Juan Mari Aburto Bilboko alkateak eta Amaia Arregi, Kontxi Claver, Eider Inunciaga eta Itxaso Erroteta zinegotziak, Mireia Zarate Sabino Arana Fundazioko presidenteak, Oihane Agirregoitia eurodiputatu jeltzaleak, besteak beste, eta dozenaka alderdikide eta alderdizalek parte hartu dute baita ere, faxismoaren aurka eta demokraziaren eta giza eskubideen alde borrokatu ziren gudarien, milizianoen eta emakumeen oroimenari errespetua erakusteko.