“Mahai gainean daukagu bizi-kalitatean, herri gisa ditugun eskubideetan eta autogobernuan aurrerapauso bat emateko aukera”. Hitz horiekin, Bizkai Buru Batzarreko presidente Iñigo Ansolak berretsi du EAJ-PNVren konpromisoa euskal autogobernua sendotzeko eta herrialde gisa aurrera egitea ahalbidetuko duen adostasun politiko zabal baten bila jarraitzeko. Ansolak adierazpen horiek egin ditu Galdakaoko lehen batzokiaren irekieraren 120. urteurrenean, Uri Erakundeak duela mende bat baino gehiago udalerrian euskal abertzaletasunaren lehen urratsak eman zituzten alderdikideei omenaldia egin dien ekitaldian.

Lehen batzoki hura 1905ean ireki zen, Kurtzeko plazako ‘Etxegorri’ etxean, euskal nortasunarekin, askatasunarekin eta zerbitzu publikoarekin konprometitutako emakume eta gizon talde baten ekinari esker. Severiano Aranzetak kudeatutako taberna xume hartatik, mende bat baino gehiagoz jeltzaleen sua bizirik mantendu duen mugimendua errotu zen. Gaurko topaketan, jeltzaleen egungo egoitzaren inguruan bildutako alderdikide, alderdizale eta ordezkari instituzional ugariren aurrean, BBBko presidenteak azpimarratu du konpromiso sortzaile haren indarrak bere horretan dirauela, eta Galdakao eta Euskadiren etorkizuna ilusio eta konbikzio berarekin eraikitzen jarraitzeko borondatea dagoela. Bere hitzaldian, Ansolak nabarmendu du EAJ-PNV beste alderdi batzuekin batera ari dela lanean egungoa gaindituko duen adostasun bat lortzeko: “Helburua da akordio sendo eta bideragarri bat eskuratzea, Madrilera joateko eta euskal gizarteari proiektu partekatu bat eskaintzeko, frustraziorik elikatu gabe”, azaldu du. Jeltzaleen buruak defendatu du akordio horren edukia hiru oinarritan bermatu behar dela: Euskadiren errealitate nazionala eta bere kultura- eta hizkuntza-identitatea aitortzea; euskal autogobernuaren gaitasun politikoak eguneratzea Europako, digital, berde eta gizarte-erronka berrien aurrean; eta Estatuarekiko alde biko harreman-sistema bat bermatzea, akordioen betetzea ziurtatuko duena.

“Aukera paregabea dugu eskumen guztiak (egungoak zein etorkizunekoak) benetan euskal herritarronak izan daitezen; autogobernuaren merkataritzarekin amaitzeko eta gure eskumenak edozein manipulazio edo truke politiko saiakeren aurrean babesteko”, adierazi du. “Gernikako Estatutuaren balioa eta egindako ibilbidea aitortzen dugu, baina ez diezagutela eskatu betetze-eza ospatzeko edo gure eskubideei uko egiteko”, nabarmendu du.

Ansolak bere hitzaldia baliatu du, halaber, azkenengo asteetan eman diren “antipolitikaren adierazpen” batzuk salatzeko. “Baina larriena”, gehitu du, “Bilduk berriro ere beste alde batera begiratzen duela da”. Izan ere, “Bildu antipolitikaz baliatzen da politika egiteko. Joko zikina, aberriaren aurka”. BBBko presidenteak mezu argi eta sendo batekin amaitu du: “Indarkeriak ez du tokirik gure herrian. Politika hitzarekin egiten da, errespetuarekin eta konpromisoarekin, duela 120 urte Galdakaoko lehen jeltzale haiek egin zuten bezala”.