Jon Aiartzak, Osasun Batzordeko EAJ-PNVko bozeramaileak, gaur Alberto Martinez sailburuak azaldu duen Euskal Osasun Ituna herritarren eskaerari erantzuteko eta osasun-arretako zerbitzuak hobetzeko ezinbesteko tresna dela adierazi du. Halaber, azpimarratu ditu Osakidetzan arreta hobetzeko eta itxaronaldia murrizteko neurriak, Osasun Mentaleko estrategiaren garapena eta osasun-langileen lan-egoera handitzeko eta egonkortzeko neurriak. Aiartzak "oso positibotzat" jo du "euskal osasun sistema osatzen duten eragileekin eta eragile politiko, sozial eta instituzionalekin etengabeko lankidetzarako lan esparrua izateko proposamena, helburu argi horrekin: Osakidetzaren kalitatea hobetzea".

Bozeramaile jeltzaleak aurretik egindako lana aitortu nahi izan du, "horrelako erronkei aurre egin zieten eta euren jakintzaren eta egitekoaren onena eman zuten pertsonek egindako lana, hain zuzen ere. Etengabeko lana 40 urtetan zehar, eta, zalantzarik gabe, lorpen kolektibo handia da. Eta ez dugu inoiz ahaztu behar hau etengabe aldatzen ari den proiektua dela". Horren ildotik, adierazi duenez, "erronka esanguratsuei egin behar diegu aurre, aldaketa demografikoak, gaixotasun kronikoen gorakada, gaixotasun berrien agerpena eta gizartearen eskaera gero eta handiagoa direla eta. Etengabeko aldaketek funtsezko eraldaketa eskatzen digute osasun-zerbitzuen prestazioan, iraunkortasuna eta epe luzerako beharretara egokitzeko gaitasuna bermatzeko".

Aiartzak, alde batetik, sailburuak aurkeztutako Talka Plana nabarmendu du, eta Osakidetzak eskaintzen duen zerbitzuaren kalitatea hobetzen lagunduko duten ekimenak garatzeko funtsezko hiru tresnaren garrantzia azpimarratu du: Kontsultak eta Proba Osagarriak Optimizatzeko Plana; Kirurgiako Itxaron-Zerrenda Optimizatzeko Plana; eta Lehen Mailako Arretako aAntolaketa-eredua Optimizatzeko Plana. "Anbizio handiko proposamena da, herritarren eskaerari erantzuten diona", ziurtatu du Aiartzak, eta azpimarratu ditu Lehen Mailako Arretan arreta eta irisgarritasuna hobetzeko neurriak, familia-medikuak artatzeko itxarote-denbora murriztea, kirurgiako itxaron-zerrendak eta proba diagnostikoetarako, kanpo-kontsultetarako eta espezialistengana bideratzeko atzerapen-denborak murriztea.

Era berean, Aiartzak osasun-langileen lan-egoera hobetzeko neurriak azpimarratu ditu. Adibidez, aldi baterako langileentzako egitura-plazak 2.000 gehiago izatea eta 2024ko abendurako 11.000 fakultatibo eta erizaintzako profesional LEPen bidez sendotzea; eta elkarrizketa sozialetik antolaketa-eredua hobetzen jarraitzea. Sailburuaren proposamenen artean, Osasun Mentaleko Estrategiaren garapena ere nabarmendu du ordezkari jeltzaleak.