Euskal Taldeak 85 zuzenketa partzial aurkeztu dizkio Estatuko 2021eko Aurrekontu Orokorren Lege Proiektuari, ekonomia sustatzeko eta industria eta enplegua babesteko Covid-19aren pandemiaren ondoriozko krisi ekonomikoaren testuinguruan.

Zuzenketa horiek guztiak kokatzen dira Europako Funtsetatik datozen inbertsioek mugatzen dituzten aurrekontuen barruan; izan ere, Erresilientzia-funts horietan dago, hain zuzen ere, kontu horien "alderdi eraldatzaile nagusia eta garrantzitsua", eta, hala ere, parlamentu-taldeek ezin dute horietan esku hartu. Hala ere, aurkeztu diren zuzenketen "kopuru handi bat" Aurrekontu Proiektuan onartzea eta sartzea espero du Euskal Taldeak, Espainiako Gobernuarekin orain arte izandako elkarrizketetan "sintonia ona" eman dela argi utzirik. Nolanahi ere, EAJ-PNVk ohartarazi du bere sei diputatuen botoa erabakiko dela "Gobernu zentralak proposamen horietan aurrera egiteko eta Euskal Taldearekin hartutako konpromisoak betetzeko orduan erakutsiko duen borondatearen arabera”.

Aurrekontu Legearen artikuluei eta hainbat partida eta programei buruzko zuzenketak dira. Horien artean, ondorengoak daude: makina-erremintaren Renove Plan baterako 50 milioi euroko funtsa, garraio eta portuetako azpiegiturak hobetzeko partidak handitzea, Unibertsitateko Lanbide Heziketaren esparruan hobekuntzak egitea, B+G arloan eta energia berriztagarrietan inbertsioak egitea, eta kultura- eta udal-proiektu sorta bat.

Horri gehitu behar zaizkio EAJ-PNVk zerga-arloan egindako proposamenak, ekonomia- eta lan-eragin sakonekoak. Horien artean, nabarmentzekoa da dieselaren igoera zuzentzeko zuzenketa, EAJ-PNVk zuzenketa partzialen izapide honetan birbideratzea espero baitu eragin ekonomiko negatiboa saihesteko, sindikatuen eta sektorearen beraren kalkuluen arabera bi milioi lanpostu arriskuan jar ditzakeena. Zuzenketa horri gehitu beharko litzaioke osasun eta hezkuntzaren BEZaren igoera Ogasun Ministerioarekin izandako aurretiazko elkarrizketetan.

AZPIEGITURAK

Euskal Taldeak, aurreko aurrekontuetan bultzatutako proiektuekin bat etorriz, zenbait zuzenketa aurkeztu ditu herrialde historikoetako aldiriko geltokietako irisgarritasuna hobetzeko partidak handitzeko. Guztira, 21 milioi euro baino gehiago bideratuko dituzte 17 proiektutara, besteak beste, Bilbon Zorrotzako lurperatzea, 6 milioi euroko zuzenketaren bidez. Era berean, 2 milioi euroko zuzenketa bat aurkeztu da Jundizko terminal intermodal eta logistikorako, eta 3 milioi euroko beste partida bat Loiolako Erriberako aldageltokirako.

EAJ-PNVk aurkeztutako zuzenketen jomuga dira, halaber, portuak eta aireportuak. Horrela, 2,3 milioi euroko zuzenketa bat aurkeztu da Forondarako, eta guztira 10 zuzenketa, 23 milioi euroko kopurua egiten dutenak, Pasaiako eta Bilboko portuetarako.

Azpiegitura hidraulikoetarako, hala nola sail ureztatuetarako, araztegietarako eta ubideetarako, 3 zuzenketa aurkeztu dira guztira. Zehazki, Arabako Barriobusto Labrazako sail ureztatuetarako (2,5 milioi €), Edar Galindo araztegirako (3 milioi €) eta Añarbeko ubiderako (5 milioi €) dira. Halaber, 3 milioi euroko partida bat dago Bilbon uholdeen aurkako proiektu baterako.

ETORKIZUNERAKO PROIEKTUAK

Era berean, etorkizunerako proiektuetarako zuzenketa-sorta zabala dago, bai energiaren arlokoak, bai unibertsitateko B+G+i arlokoak. Horrela, CENERentzat 4 milioi euro bideratzen dira energia biltegiratzeko laborategi baterako; 8 milioi BIMEPentzat (Biscay Marine Energy Platform) eta 1,5 milioi euro Energigune IKZko elektromugabilitate-proiektu baterako. Halaber, milioi bat euroko balioa duten bi zuzenketa aurkeztu dira Mondragon Unibertsitatearentzat eta Deustu Fundazioarentzat, eta 2,6 milioi euro EHUn azpiegitura zientifiko tekniko baterako.

ARTIKULUAK

Artikuluei dagokienez, hainbat zuzenketa egin dira kontratazioa eta enplegua sustatzeko. Horien artean, nabarmentzekoak dira sektore publikoko kontratazioa eta bitartekoen lana sendotzea sustatzera bideratutakoak, baita planta judizialeko lanpostuak behar bezala betetzera bideratutakoak ere, eta unibertsitateko prestakuntza dualerako kontratuaren kontratu-figura sortzen duena.

Euskal Taldeak erreklamazio historikoa eraman du artikulura: Donostiako Udalari Loiolako kuartelak hartzen dituen lurrak besterentzea. Eta, zuzenketa bidez, EAEk SEPIren kudeaketa- eta zuzendaritza-organoetan parte hartzea eskatu du, bai eta bere herrialdeko turismo-paradoreen kudeaketa eta ustiapena ere.

Azkenik, sei zuzenketa proposatu dira mutualitateen bideragarritasunari laguntzeko.

KOSTA ETA KULTURA

Kultura proiektuei dagokienez, EAJ-PNVk zenbait zuzenketa proposatu ditu, lehendik dauden partidak hobetzeko. OLBEren, Musika Hamabostaldiaren, Euskaltzaindiaren edo Aranzadi Fundazioaren kasua da hori. Lekunberrin 300mila euroko balioa duen proiektu baterako zuzenketa bat eta Baztango Amaiur Museorako zenbateko bereko beste partida bat ere aurkeztu dira. Azkenik, hainbat udal proiektutarako partidak daude Irunen (Plaiaundi), Donostian (Kontxako baranda), Lekeition (Mendietako Ontziola) Lezaman (Trenbide Zaharraren eraldaketa), Orion (Oribarzar hondartza), Gasteizen (Espainiako Bankua) eta Azkoitian (Idiakez-Ederra birgaitzea).