Metropoli Hegoaldeko Saihesbidearen 1b faseko obretan beste mugarri batera iritsi dira aste honetan, Bolintxuko errekaren gaineko zubibideko bi azpiegituretako bat eraitsi baitute. Imanol Pradales Azpiegituretarako eta Lurralde Garapenerako diputatuak azaldu duenez, obrako osagairik konplexuena izan da, eta hura arrakastaz gauzatu ondoren atzerako zenbaketa hasi da, azpiegitura urtebete barru zerbitzuan jartzeko.

"Konplexua izan da. Hiru egun eman dituzte lanean jo eta ke eraiste maniobra egiteko. 80 profesional baino gehiago aritu dira, eta aurretik plangintza lan handia egin behar izan da. Eta lortu da. Ezbeharrik gabe lortu ere. Espero dugu urtebete barru jada funtzionamenduan izango dela goi-lautadarekiko konexio estrategiko hau, Supersurraren egungo trazadura AP-68 autobidearekin elkartzen duena Peñascaleko lotunetik aurrera. Azpiegitura erabakigarria izango da Bizkaiko mugikortasunaren etorkizunerako, eta Bizkaiko saihesbide handia konektatuko du, itsasadar azpiko tunelarekin batera. Beraz, gaur hasi da atzerako zenbaketa Bizkaiko etorkizuneko saihesbide handiaren lehenengo pieza zerbitzuan jartzeko", baieztatu du Imanol Pradalesek.

Diputatuak obraren diseinuan eta exekuzioan parte hartu duten eta parte hartzen ari diren enpresa guztien lanaren balioa nabarmendu du, bai eta Bolintxuko ibarrean sartu gabe hura planifikatu eta gauzatu beharrak erantsi duen konplexutasuna ere. "Azpimarratu nahi dut euskal enpresak direla, eta aste honetan berriro erakutsi dutela oso goian dabiltzala ingeniaritzaren eta azpiegituren eraikuntzaren arloan. Arnotegiko tuneletik Seberetxeko tunelera 162 metro daude eta zailtasun erantsia izan da errekaren gainetik zubia egitea. Hasieratik erabaki genuen ibarrean makineriarik sartu gabe ekingo geniola obra honi. Eta bete egin dugu. Berariazko konponbide bat diseinatu zen, ibarrean euskarririk izan gabe eraiki behar ziren bi zubibideren bitartez. Horretarako beharrezkoa izan da bertikalean eraikitzea: 162 eta 142 metroko bi taula bertikalean eraiki eta gero biak etzatea", azaldu du.

Datu teknikoak

Aste honetan egindako maniobran, eraitsi eta itxi egin dira Bolintxuko zubibideetako Gasteizeranzko ardatzari eusten dion arkuaren bi arkuerdiak. Arku horrek 145 metroko luzera du eta 40 metroko tartea egiten du Bolintxuko errekaren gainetik, azpiko landaredia eta fauna ukitu gabe.

Maniobra egiteko, egituren, instrumentuen, altuerako lanen, topografiaren, droneen eta atxikipen sistema hidraulikoen arloetako espezialistarik onenak jarri dira lanean. Hori guztia koordinatu eta zuzendu dute PAGABIDEA ABEEko teknikariek (Cantábricas, Gaimaz, Campezo eta Geotúnel enpresek osatzen dute ABEE hori).

Eraiste eragiketa hiru egunetan zehar egin da. Lehenengo egunean, arkuerdiak bereizi egin dira txarrantxa eta sarbide izan diren dorre lagungarrietatik. Maniobra horretan hiru enboloko lau katu erabili dira, bi estribuen aurrealdean bermatuta. Eragiketa horren bidez, arkuerdien muturra 5 metro bereizi da bere bertikaletik. Ordutik aurrera, 66 kablez osatutako lau lokarrik eusten zioten egiturari (bik arkuerdi bakoitzeko). Lokarri horiei 1.500 tonako lau katuk eusten zieten. Une horretan kable bakoitzak 120 tonako pisua jasaten zuen.

Bigarren egunean katu horiek aktibatu egin dira eta apurka kablea askatuz joan da hurrenez hurreneko enbolokadetan, bi arkuerdien jaitsiera kontrolatuari ekiteko. Hiru geldialdi egin dira egituraren ibilbidea kontrolatzeko eta haren desbideratzea egiaztatzeko, ibilbide teorikoarekin alderatuta, bai eta haren tenkatze egoera ere, kalkuluko eredu teorikoarekin alderatuta. Amaierako posizio horretan, kableek 900 tonako pisua jasaten zuten.

Hirugarren egunean hurbiltze maniobra eta bi egituren arteko azken ahokatze lanak egin dira. Arkuerdietako baten muturrean jarritako kameren eta droneek zuzenean grabatutako irudien laguntzaz, bi egituren arteko azken ahokatzea burutu da. Une horretan, langile espezialistak garabi autopropultsatu baten bitartez garraiatu dira, bi piezen arteko azken ahokatze lanak egin eta behin betiko konexioa berma zezaten.

Hurrengo egunetan giltzarria ixteko lanak amaituko dira eta arkua berez funtzionatzen hasiko da, doitasun milimetrikoarekin bera etzan eta kokatzea ahalbidetu diguten kableak kenduta.

ITURRIA: BFA