EAJk irabazi egin du Bilboko eta Donostiako udaletan, Bizkaiko eta Arabako Batzar Nagusietan, eta indar erabakigarria izango da Nafarroa eta Iruñearen etorkizunerako Geroa Bairen barruan. Hala ere, Andoni Ortuzar Euzkadi Buru Batzarreko presidenteak aitortu du maiatzaren 28ko hauteskunde egunak zapore “gazi-gozoa” uzten diola alderdi jeltzaleari.

Sabin Etxean egindako agerraldi publikoan, Ortuzarrek aurreratu du Euzko Alderdi Jeltzaleak bi ikuspegi desberdinetatik aztertzen dituela emaitza horiek. “Alde batetik, Euskal Autonomia Erkidegoko lehen indar politikoa izateari eusten diogu, eta erabakigarriak izango gara Nafarroan eta Iruñean. Eta, bestetik, Euskadin oro har parte-hartze txikia izateak emaitza horiek iluntzen ditu. Ez da hainbeste beste alderdi batzuek gora egin izana, baizik eta EAJk behera egin duela; aintzat ona hartzen dugu”, ziurtatu du. Autokritika irmo eta ausardiaz egiteko konpromisoa hartu du EAJk. “Alderdi liderra izateak zeregin hori seriotasunez hartzera behartzen gaitu”, jakinarazi du. Zehaztu duenez, “parte-hartze jaitsiera horrek kalte egin digu eta, neurri batean, gure emaitzen ehunekoen jaitsiera azaltzen du. Kanpainan behin eta berriz esan dugu garrantzitsua zela parte hartzea, baina gure eskaera ez du herritarren artean oihartzunik izan”.

Era berean, Ortuzarrek azaldu du “kanpaina tentsio handikoa izan dela eta desnaturalizatuta geratu dela, bai EAEko foru- eta udal-hauteskundeen esparruan Estatuko politika sartu delako, bai gaur Euskadin benetan bozkatzen zenarekin zerikusirik ez duten gertaerengatik. Giro nahasi eta gaiztotu horrek hautesleen zati bati atzerakada eragin dio, eta, bereziki, gobernatzeko ardura zuen alderdiari eragin dio, hots, Euzko Alderdi Jeltzaleari”.

Nolanahi ere, EBBko presidenteak konpromisoa hartu du “emaitza horiek aztertzeko eta ekintza politikoa errealitate berri horretara egokitzeko. Badakigu gizarteak zailtasunak dituela garai berri honetan. Arduraz jokatuko dugu, betiere erakundeen egonkortasuna eta gobernagarritasuna bermatzen saiatuz. Oposiziotik ere arduraz jokatuko dugu, herritarren ongizatean eta bizi-kalitatean eragin zuzenena duten eskaerei erantzuna ematen laguntzeko”. “Gure konpromisoa udalen eta foru-aldundien gobernagarritasuna erraztea da, zerbitzu publikoen bermeari eta hobekuntzari lehentasuna emanez, ziurgabetasun ekonomikoko eta nazioarteko panorama oso konplexuko egoera batean. Bihar EBBk negoziazio politikoen prozesua garatzeko estrategia erabakiko du, gainerako alderdiei berehala deitzeko”, amaitu du.