Bizkai Buru Batzarreko lehendakariak esan dau EAJ/PNV alderdiak ez dauala kontuan be hartu Batasuna hurrengo udal eta foru hauteskundeetara aurkeztu ez izateko aukerea. Ildo horretan ondokoa esan dau: "iruzurra egingo litzakio su-etena iragarri ondorengo itxaropenari", bake prozesuari eta "euskal gizarteak ideia batzuk edo beste batzuk aukeratzeko askatasunari". Ganera, EAJ alderdiko EBBaren bozeramaile ere badan Iñigo Urkulluk PSE-EEri eta Batasunari eskatu deutse alde batera utz daien Arnaldo Otegi buru dauan alderdiaren legezkotasunari buruzko eztabaidea eta normalizazinoan jar daien arreta osoa. Urkullu ziur dago ezker abertzaleak hurrengo hauteskundeetan parte hartuko dauala; izan be, holan ez bada, “iruzur egingo litzakio” su-etenaren osteko itxaropenari. Bere esanetan, iraila “alde biko alkarrizketarako hilabete bizia izango da" eta gero alderdi askoren arteko alkarrizketak izango dira.