Getxoko EAJ-PNVk uste du Alderdi Popularrak eta EH Bilduk Irurak Bat auzia baliatu dutela susmoak zabaltzeko eta EAJ-PNVri higadura politikoa eragiten saiatzeko. Ebazpen judizial berriak bi alderdien errekurtsoak atzera bota eta auzi penalaren artxibatzea berresten duenez, jeltzaleek erantzukizun politikoak eskatu dituzte egindako salaketengatik eta horiek pertsonengan zein erakundeetan izan dituzten ondorioengatik.

Epailea argia izan da berriro ere: Irurak Bat eraistea hirigintza-araudiak baimentzen zuen, eta ikertutako gertakariak ez dira delitu. Eta ez da froga faltaren kontua. Magistratuak berariaz azaldu du ez dagoela ikerketarekin jarraitzeko beharrik, salatutako gertakari guztiak frogatuko balira ere, ez liratekeelako delitu izango.

Ez da EAJ-PNVk dioena. Epailearen ondorioa da, eta orain berriro berretsi du bere erabakia. Getxoko EAJ-PNVren ustez, ebazpen honek berriz ere mahai gainean jarri du prozedura judizialetik harago doan gai bat: alderdi politikoek oposizio-lanean duten erantzukizuna.

Hilabeteetan salaketa larriak egin dira, udal-langileen profesionaltasuna zalantzan jarri da, baita arduradun publikoen zintzotasuna ere. EAJ-PNVko hiru zinegotzik dimisioa aurkeztu zuten, eta Amaia Agirre alkatearen dimisioa ere eskatu zen. Prozesu hark izan zituen ondorio politiko eta pertsonalak ez dira ebazpen judizial batekin desagertzen.

Jeltzaleen ustez, PP eta EH Bildu auzi honi etekin politikoa ateratzen saiatu dira, EAJ-PNVren lana zalantzan jartzeko susmoei eutsiz. Haien iritziz, deliturik izan ote den zalantza luzatzeak, epaileak behin eta berriz azaldu duenean zergatik ez duen halakorik ikusten, nahasmena eta mesfidantza areagotu du herritarren artean.

Oposizioa egiteak ere erantzukizuna eskatzen du. Gobernuaren jarduna kontrolatzea, haren erabakiekin bat ez etortzea edo auzitegietara jotzea eskubide legitimoak dira. Baina era berean, pertsonen izen onari eta erakundeekiko konfiantzari eragiten dieten salaketak egiten direnean, zorroztasuna eta erantzukizuna eskatzea ere zilegi da.

Getxoko EAJ-PNVk gogorarazi du alkateak dagoeneko erantzukizunak eskatu zituela publikoki, irailean auzia artxibatu zela jakin ondoren. Orduan, salaketa larriak egin, pertsonak seinalatu eta dimisioak eskatu zituztenei ebazpen judizialaren edukia ere publikoki onar zezatela eskatu zien.

Orain, PPren eta EH Bilduren errekurtsoak atzera bota ondoren, EAJ-PNVk erantzukizunak eskatu dizkie berriro zuzenean bi alderdiei. Ebazpen berri hau nola baloratzen duten publikoki azal dezatela, orain arte egindako salaketen oinarria argitu dezatela eta beren adierazpenek eta dimisio-eskaerek izan dituzten ondorioengatik politikoki erantzun dezatela eskatu die.

Alkateak irailean adierazi zuen bezala, “seinalatzea publikoa izan denean, erreparazioak ere publikoa izan behar du”.

Getxoko EAJ-PNVren ustez, ez da nahikoa gaia atzean uztea, salaketek eta seinalatzeek eragin duten kaltea aitortu gabe. Erantzukizun politikoa ez da soilik besteei azalpenak eskatzea; norberaren hitz eta jardueren gaineko erantzukizuna hartzea ere bada.

Jeltzaleek gogorarazi dute PPren eta EH Bilduren apelazio-errekurtsoek izapidetzen jarraitzen dutela eta, beraz, auziaren artxiboa oraindik goragoko auzitegi batek berrikusi ahal izango duela.

Bitartean, herritarrei argi helarazi beharreko ondorio judizial bat dagoela esan dute: epaileak PPren eta EH Bilduren erreforma-errekurtsoak atzera bota dituela, eta berretsi egin duela ikertutako gertakariak ez direla delitu.

Oposizioko taldeek erabaki politikoak zalantzan jartzeko eskubidea dutela adierazi dute. Baina euren salaketen ondorioen erantzukizunak beren gain hartzeko betebeharra ere badutela gogoratu dute jeltzaleek. “Politikan denak ez du balio“.