Areatzako EAJ-PNVren Uri Batzarrak aho batez aukeratu du Benja Irusta Ortiz 2027ko udal hauteskundeetarako alkategai. Izendapen honekin, alderdi jeltzalea herriaren egungo beharretatik abiatutako proiektu berri bat lantzen hasi da, Areatzak bultzada berri bat behar duela sinetsita, dituen erronkei aurre egiteko, udal zerbitzuak hobetzeko eta herritarrek beren bizi-proiektuak herrian garatzen jarraitzeko aukerak sortzeko.

Betidanik Areatzan bizi izan den eta enpresa pribatuan lan egiten duen Irusta Ortizek gertutik ezagutzen ditu udalerriaren errealitatea eta bertako herritarren kezkak. Bere ibilbide profesionala eta kudeaketan duen esperientzia izango ditu oinarri ardura berri honi heltzeko. Ilusioz, lan egiteko gogoz eta bere ezagutzak herriaren zerbitzura jartzeko borondatez ekingo dio etapa berriari.

“Areatza nire herria da, eta bizitzeko leku ona izaten lagundu nahi dut, herritarren beharrei erantzungo dieten zerbitzuekin eta beren bizi-proiektua hemen garatu nahi dutenentzako aukerekin. Ilusio handiz hartzen dut hautagaitza hau, baina baita dakarren erantzukizunaz ere. Lan handia dugu aurretik, eta egiteko gogoz gaude”, adierazi du Benja Irusta Ortizek.

Areatzaren beharrei erantzuteko proiektua

Etxebizitza eskuratzeko aukerak erraztea izango da hautagaitza jeltzalearen lehentasunetako bat, udal-zerbitzuak hobetzearekin eta herriaren eguneroko beharrei erantzutearekin batera. EAJ-PNVren ustez, arlo horiek Udalaren ekintzaren erdigunean egon behar dute, egungo arazoei irtenbideak emateko eta datozen urteetarako Areatza prestatzeko proposamenen bidez.

Ildo horretan, hautagaiak herritarrekin harreman zuzena izatearen, haien kezkak ezagutzearen eta horiek ekimen zehatz bihurtzearen aldeko apustua egiten du. Bere helburua eguneroko beharrei erantzutea eta udalerriaren etorkizunari begirako ikuspegia uztartuko dituen lan egiteko modu bat bultzatzea da.

“Areatzako herritarrek Udala laguntzeko eta haien kezkei erantzuteko dagoela sentitzea nahi dugu. Etxebizitza, zerbitzuak eta etorkizunerako aukerak gai garrantzitsuak dira gure herriarentzat, eta horiei erantzuteko lana, plangintza eta erabakiak behar dira. Gure konpromisoa entzutea, irtenbideak proposatzea eta horiek gauzatzeko lan egitea da”, nabarmendu du Irusta Ortizek.

Izendapen honekin, Areatzako EAJ-PNVk lan-etapa berri bati ekin dio datozen udal hauteskundeei begira, herriaren beharrei erantzungo dien gobernu-alternatiba bat eskaintzeko borondatez. Alderdi jeltzaleak defendatzen du Areatzak ekimena izango duen Udala behar duela, herritarren eskaerei erantzuteko eta udalerriko bizi-kalitatea hobetzen lagunduko duten proiektuak bultzatzeko gai izango dena.

“Uste dugu Areatzak aukera asko dituela aurretik, eta horiek guztiak baliatzeko lan egiteko unea dela. Etorkizunari begiratuko dion proiektu bat eraiki nahi dugu, baina gaur egun gure herritarrek behar dutena ahaztu gabe. Konpromiso horrekin ematen dugu urrats hau”, ondorioztatu du Benja Irusta Ortizek.