Dimako EAJ-PNVk legealdi honetan oposiziotik egindako lanaren balantzea egin du, udalerriaren beharrei entzuteko, alternatibak proposatzeko eta herritarren bizi-kalitatea hobetzen lagunduko duten ekimenak sustatzeko ahalegina ardatz izan duen ibilbidean. Etxebizitza lehentasun nagusietako bat izanik, alderdi jeltzaleak irtenbide errealistak bultzatzearen alde egin du, egungo beharrei erantzuteko eta, aldi berean, Dimaren etorkizunerako oinarriak ezartzeko.

EAJ-PNVren ustez, udal-politika herritarren arazoak konpontzen lagunduko duten erabakietan gauzatu behar da, Udalean hartzen den erantzukizuna edozein izanda ere. Hortik abiatuta, alderdi jeltzaleak urte hauetan lan egin du Diman etxebizitza-aukera berriak irekitzeko, dauden baliabideak aprobetxatuz eta datozen urteetako beharrei aurrea hartzea ahalbidetuko duen hirigintza-plangintza eskatuz.

“Oposizioan egoteak gure herriarekiko ardurak hartzea ere esan nahi du. Horregatik, dauden beharrak mahai gainean jartzeaz gain, alternatiba bideragarriak proposatzeko eta urrats zehatzak ematea lortzeko lan egin dugu. Etxebizitza kezka handia da Dimako herritar askorentzat, eta uste dugu erantzunak behar direla, ez asmo onak soilik”, adierazi du Dimako EAJ-PNVk.

Aurrerapauso nagusietako bat baserriak banatzeko ordenantza onartzea izan da. EAJ-PNVk bultzatu eta landutako ekimen horri esker, dauden eraikinak hobeto aprobetxatu eta udalerrian bizitzeko aukera gehiago eskaini ahal izango dira.

Araudi berriak hondatuta edo desagertzeko arriskuan dauden baserriak berreskuratzeko aukera ematen du, eta, aldi berean, etxebizitza-eskaintza handitzea ahalbidetzen du, eraikin berriak egin beharrik gabe. Gainera, hainbat herritarrek beren baserriak behar berrietara egokitu ahal izateko egindako eskaerei ere erantzuten die.

“Dimak berezko ezaugarriak ditu, eta etxebizitzaren arloko irtenbideek errealitate hori izan behar dute abiapuntu. Gure ondarearen parte diren baserriak ditugu, eta horiek aukera berriak eskain ditzakete herrian bizitzeko. Ordenantza honen bidez, orain arte ez zegoen aukera bat zabaltzen lagundu dugu, gure ondarea berreskuratzea eta etxebizitza-beharrei erantzutea uztartzeko aukera emanez”, nabarmendu du alderdi jeltzaleak.

Datozen urteetako Dima gaurtik planifikatzea

Neurri honekin batera, EAJ-PNVk legealdiaren hasieratik azpimarratu du Hiri Antolamendurako Plan Orokor (HAPO) berria egiten hasteko beharra, ezinbesteko tresna delako udalerriaren garapena antolatzeko eta etxebizitza-aukera berriak aztertzeko.

EAJ-PNVk urtez urte eskatu du prozesu hori martxan jartzeko aurrekontu-partida bat jasotzea, Bizkaiko Foru Aldundiak udal hirigintza-plangintza egiteko eskaintzen dituen laguntza garrantzitsuak ere kontuan hartuta.

Hala eta guztiz ere, 2026ko aurrekontuetara arte ez da helburu horretarako lehen partida bat jaso, 1.000 eurokoa, EAJ-PNVk eskaera egiten hasi eta hiru urtera. Gaur egun, HAPO berria egiteko lanak lizitatzeko baldintzak onartzeko fasean dago prozedura.

EAJ-PNVk positibotzat jo du azkenean lehen urrats horiek eman izana, baina prozesua lehenago hasi behar zela uste du. “Legealdi osoa daramagu Dimak hirigintza-plangintza berri bat behar duela azpimarratzen. Ezin dugu arazoak konpontzea zailagoa izan arte itxaron plangintza egiten hasteko. Gure udalerriak dituen aukerak aztertu behar ditugu, eta hurrengo belaunaldietan ere pentsatuz hartu erabakiak”, azpimarratu du.

Ildo beretik, Dimako EAJ-PNVk eskaera berri bat erregistratu du Udal Gobernuari zuzenduta, etorkizuneko HAPOak etxebizitzak eraikitzeko lurzoru publikoaren erreserba bat jaso dezan. Alderdi jeltzaleak azpimarratu du Udalak modu aktiboan parte hartu behar duela etxebizitza eskuratzeko zailtasunei irtenbideak bilatzen, eta hirigintza-plangintza berriaren lanketa aprobetxatu behar duela etorkizunean etxebizitza-proiektuak garatzeko aukera emango duten espazioak aurreikusteko.

Alderdi jeltzalearen ustez, ekimen horiek guztiek helburu bera dute: epe laburrean etxebizitza-aukera berriak eskaintzea eta Dima epe ertain eta luzera begira prestatzea. Baserriak banatzeko ordenantzak egungo behar bati erantzuteko aukera ematen du; HAPO berriak eta lurzoru publikoa erreserbatzeko proposamenak, berriz, etorkizuneko hirigintza-erronkei aurre egiteko bidea ireki nahi dute.

Dimako EAJ-PNVren ustez, lan horrek legealdi honetan oposiziotik jarduteko izan duen modua islatzen du: proposamenak egitea eta udalerriarentzat benetako hobekuntza ekar dezaketen irtenbideak bilatzea.

“Beharrezkoa da Dimak behar duena aldarrikatzea, baina gure ustez, benetan garrantzitsua dena gauzak aurrera ateratzea da. Gure lehentasuna proposamenak aurrerapauso zehatz bihurtzeko lan egitea izan da, eta hala izaten jarraituko du. Hitz gutxiago eta ekintza gehiago, jokoan dagoena dimatarrek beren bizi-proiektua hemen garatzeko aukera gehiago izatea baita”, ondorioztatu du Dimako EAJ-PNVk.