Sondikako EAJ-PNVk legegintzaldiko programaren jarraipena egin du eta, jasotako datuen arabera, aurreikusitako 39 ekintza zehatzetatik 35 eginda edo bideratuta daude. Horrek esan nahi du konpromisoen %89,7k aurrera egin dutela edo datozen hilabeteetarako bidea zehaztuta daukatela.

Zehazki, aurreikusitako ekintzetatik 21 eginda daude dagoeneko, guztizkoaren %53,8. Beste 6 ekintzatan lanaren zati garrantzitsu bat gauzatu da jada, %15,4, eta 8 ekintza bideratuta daude, %20,5. Sondikako EAJ-PNVren arabera, datuek konpromisoen jarraipena egiteko eta horiek betetzeko egindako lana islatzen dute.

“Hauteskundeetan herritarrei emandako hitzak balioa du betetzen denean. Horregatik, 39 konpromisoetatik 35 eginda, aurreratuta edo planifikatuta izatea oso datu azpimarragarria da. Hori da, hain zuzen, gure gobernatzeko modua: esandakoa betetzea eta proiektuak aurrera eramatea”, adierazi dute Sondikako EAJ-PNVtik.

Legegintzaldi honetan, Udala herritarrengana hurbiltzea izan da lan ildoetako bat. Horren barruan kokatzen da urtea amaitu baino lehen zabaltzea aurreikusita dagoen Herritarren Arreta Zerbitzua, HAZ. Horrekin batera, Aurrekontu parte-hartzaileak eta Auzoetako zinegotzia bezalako proiektuek indartu egin dute Udalaren eta herritarren arteko harremana.

Mugikortasunean ere urratsak eman dira. AuzoTaxi zerbitzua jarri da martxan, auzoen eta erdigunearen arteko lotura errazteko eta, bereziki, garraio aukera gutxiago dituzten herritarrei mugitzeko aukera gehiago eskaintzeko.

Osasunaren arloan, Eusko Jaurlaritzarekin elkarlanean, Osasun Zentro berria eraikitzeko lanak martxan jarri dira, eta Gorondagane Eskolako hobekuntza lanak amaituta, inklusibitate proiektuek ere aurrera jarraitzen dute. Era berean, Tokiko Energia Komunitatea bultzatzeko urrats garrantzitsuak eman dira.

Kohesio soziala indartzeko ekimenak ere jarri dira abian: Aztarna Gazte Taldea sortzen lagundu da, Emakumeen Kontseilua sortu eta dinamizatu da eta nagusientzako jarduerak bultzatu dira.

Herritarren egunerokoa eta bizi kalitatea hobetzeko, Udal kiroldegiak hobetzeko eta eskaintza zabaltzeko lanak egin dira; herriko merkataritza eta elkarte sarea babesteko ekimenak sustatu dira; eta irisgarritasuna hobetzeko proiektuek aurrera egin dute.

“Oraindik badaukagu lana aurretik, eta horretan jarraituko dugu: martxan dauden proiektuak amaitzen, planifikatutakoak gauzatzen eta Sondikaren behar berriei erantzuten. Herritarrei emandako hitza eguneroko lanarekin betetzen da, eta hori izango da legegintzaldia amaitu arte gure egiteko modua”, amaitu du Sondikako EAJ-PNVk.