Iñigo Urkullu Euzkadi Buru Batzarraren bozeramaileak aditzera eman duenez “erabaki honek behingoz eta betirako gainditu ditu Estatuaren administrazioak nahiz hainbat administrazio autonomikok Kontzertu Ekonomikoaren kontra erabili ohi zituzten aitzakiak”. Urkulluk azpimarratu du “oraingoan guk geniona onetsi dute Europan eta arrazoia genuela erabaki. Kontzertu Ekonomikoa Euskal Herriaren eskubidea da eta honelakorik ukatzen duena espainiar Konstituzioaren aurka ezezik, europar legeriaren kontra ere arituko da aurrerantzean”. EBBren bozeramailearen iritziz, epaiak PPk Kontzertu Ekonomikoaren aurka erabili ohi duen jokabide guztia hankaz gora jartzen du. “Errioxako zein Kantabriako erkidegoak eta PP alderdia bera batere argudiorik gabe geratu dira euskal sistema fiskalaren kontra areagotu nahi zuten borroka politiko horretan”.