Buruzagi jeltzaleak esan du EAE-ANV edo EHAKen balizko ilegalizazioak ez lukeela lagunduko “bizikidetza politikoa normaltzen” eta uste du “politikatik bakea lortzeko ahal dena egin daitekeela”.

RNErekin eginiko elkarrizketan esan du “gaizki” sentitzen dela atzoko atentatuaren ondoren, ETAk zituen asmoei buruzko “beldurrak egiaztatu direlako”. Horregatik, “hautsi nahi dugun espiral honek jarraituko duela” uste du.

Zentzu honetan, gogora ekarri du “euskal gizarteko gehiengo handi batek” ETAri esaten diola euren “bizitzetan traba egiten diela”, baina taldeak “ez die kasurik egiten”. “Izua zabaldu nahi du eta aspaldiko garaietara bueltatu da, ETAk berak (eta batez ere isiltzen direnek eta indarkeria ustezko motibazio politikoekin justifikatzen dutenek) garai horiek gainditutzat ematen zituela uste genuen arren”.