Ekaitzak etxebizitza bloke baten teilatuaren zatia hondatu zuen eta 50 metrotara eraman zuen, beste etxebizitza blokearen kontra egin arte. Udal arkitektoak eginiko txostenaren arabera, eraikinaren egitura ondo dago eta beraz, familiek etxera itzultzeko aukera izan dute.

Udalerri osoan kalte handiak izan dira eraikinetan, teilatuetan eta egituretan. Ondasun publikoetan ere izan dira kalteak, besteak beste hilerrian, eroritako zuhaitzek hilobiak hondatu dituztelarik, golf zelaian, futbol zelaian eta abar... Horrez gain, hainbat linea elektriko botata daude oraindik, sare elektrikoa eta telefonia sarea ondo funtzionatzen duen arren.

Gaurkoan ere Urduña aldean dabiltzan haize bolada gogorrek suhiltzaileen eta kalteak ebaluatzeko lanetan ari diren langileen lanak oztopatzen dituzte. Udalak kalteturiko auzokide eta enpresei gomendatu die ezer baino lehen aseguru konpainiekin harremanetan jar daitezela eta ekaitzak eragindako kalteen argazkiak egin ditzatela. "Oso garrantzitsua da Udalak kalteturiko pertsonen datuak, argazkiak eta aseguru ezberdinetako perituen aktak jasotzea, kalte eta kaltetuen erregistroa  egiteko eta horrela Estatuko Gobernuarekin eta Eusko Jaurlaritzarekin behar besteko laguntasunak bideratzeko". Udala harremanetan jarri da gobernu biekin, beharrezko laguntasunak lortze aldera.