Buruzagi jeltzaleak Patxi Lópezen gobernuari egotzi dio "azken hogeita hamar urteetako gobernua abertzalean ezkutatzen ahalegintzea". Ortuzarrek adierazpen hauek Alfonso Castelao-ren omenez Txurdinagan burutu den ekitaldian egin ditu. Bertan bildu dira, besteak beste, Iñaki Azkuna Bilboko Alkatea eta Ibon Areso, José Luis Sabas, Sabin Anuzita eta Asier Abaunza zinegotzi jeltzaleak. Bizkai Buru Batzarraren presidentearen ustez, Lópezen Gobernua "geldirik dago, ez du ezertxo ere egiten. Txipiroiaren taktika jarraitzen du, hau da, Ibarretxeren Gobernua eta abertzaleen azken hiru hamarkadetako lana zikindu nahi ditu". "Gobernu berri honek arazo larri bat dauka, hots, ez da Herrialde honek behar duen mailara heltzen ez eta herrialde honetako hiritarrek eskatzen duten mailara heltzen".

Era berean, buruzagi abertzalea arduratuta agertu da oso, izan ere, "kudeaketa tamalgarri honen erruz azken zortzi hilabeteetan zor publikoa bider hamar egin baitu".