Alkateak, hedabideen aurrera egindako agerraldian, Eusko Jaurlaritzaren menpe dagoen URAk, Uraren Euskal Agentziak Gobela Errekarako duen proiektuaren jarraipenari buruz dituen azken berriek sortarazi dizkioten ardura eta zalantzak agertu nahi izan dizkie Getxoko herritarrei. Landaren arabera, Eusko Jaurlaritzak datozen hilabeteetan erabakiko du EAEko erreka eta ibaietan egin asmo dituen jardueretarako, inbertsio aldetik zeintzuk duten lehentasuna. Antza denez, 60 proiektutik gora dira, eta horien artean omen dago ere Gobelako proiektua, gaur arte "proiektu horien artean erreka honetan egin beharreko lanek duten lehentasuna zein den zehatz-mehatz ez dakigun arren".

Alkateak, aipatu informazioak ardura eta zalantzak eragin dizkiola eta, gaur bertan premiazko bilera eskatu dio Eusko Jaurlaritzako Ingurumen sailburu Pilar Unzaluri, datozen urteotan proiektu honen garatzea bermatuko duten inbertsio planaren gainean Gobernuak dituen asmoak bertatik bertara ezagutzeko. "Eta batzar horretara, ziur nago, auzotarren eta baita udalerriko alderdi politiko guztien babesarekin joango naiz. Gainera, alderdiak Bozeramaleen Batzordera deituko ditut aste honetan bertan maiatzeko udalbatzara adierazpen instituzionala eramateko. Bertan Eusko Jaurlaritzari eskatuko diogu datozen urteotan behar diren aurrekontuekin, proiektu orokorraren tramitazio eta exekuzioarekiko konpromisoari eustea".