Abertzale haietako bat liburu honen protagonista da: Felipe Egiguren, Gerra Zibila eta diktadura frankista jasan behar izan zituen euskal herritar belaunaldi haren adibideetako bat. Argitalpenak haren oroipenak jasotzen ditu, jaio zenetik eta (Ondarroan, 1903an) 1945era artekoak, gerrako eta gerraosteko urteetakoak batez ere.

Liburuan kontatzen denaren interesa mintzagai dituen zenbait uneren deskripzioan datza: Ondarroako bizitza Primo de Riveraren diktaduraren sasoian, eta Egigurenek aurkezten digun errepresio frankista latz haren azalpena, besteak beste. Errepresio hura berak ere jasan behar izan zuen zuzen-zuzenean, 1937k eta 1945 bitartean pairatu zituen zenbait espetxe eta kontzentrazio-esparrutan.

Horrekin guztiarekin batera, irakurleak oinarriko militante jeltzale baten bizitzaren deskripzioa ere aurkituko du, bai halaber aipatu mugimendua erakusten digu, bizi zituen eta protagonista izan zen garai zail haietan.