Gogorregi Konpartsaren ekimenez, eta Bilboko Aste Nagusiaren barruan, gaur, 'Gure Señeak' izeneko Elkartea txandaka arituko da Gogorregik Pio Baroja plazan haur jolasen gunearen alboan instalatuta duen txosnan, goizeko hamaiketatik gaueko hamaiketara. Tarte horretan bilduko den dirua Elkartearentzat izango da. "Gure aldetik, mila esker Gogorregi Konpartsari, eta txosnara joatera gonbidatzen zaituztegu guzti-guztiok", adierazi dute Derioko elkartekideek.

Gure Señeak Elkartea irabazi asmorik gabeko erakundea da, gaixo bitxiak edo gaigabezia egoera bereziak jasaten dituzten seme-alabak dauzkaten Derioko familiengandik hurbil den pertsona-talde baten interesari eta ardurari esker sortu zena. Elkartea sortu zenean, ondokoa zen xede nagusia: haur horien itxaropena eta bizi-kalitatea hobetzen laguntzea, eta haien familiek laguntzarako ate bat zabalik aurki dezaten bideratzea, urratu behar duten bidaia luze eta latz horretan. Horrezaz gainera, zenbaitetan, haur horiek jaso behar izaten dituzten tratamendu bereziak oso-oso garestiak izan ohi dira, halako moldez non osasun publikotik at geratzen baitira.

Xedea hori delarik, Gure Señeak Elkarteak haur horien eta beraien familien bizi-kalitatea hobetzen laguntzeko ekintzak abiarazi nahi ditu, hots, haur eta familiok sarri askotan jasan behar izaten duten gizarte-bakartzea saihesteko ekintzak abian jarri eta erakunde publiko eta pribatuen laguntza jasotzeko sostengua eskuratu, gizarte, erakunde eta komunikabide alorrei doakienez.