“Desgaste-kanpaina jasaten ari gara, eta, kanpaina horretan, Euskadigaz mugakide diren lurraldeek euren ardauak “txakolin“ marka generikoagaz merkaturatu gura dabez, araudi propiotik eta erkidegoko arauditik kanpo” gaineratu du Jose Luis Bilbao Berroja Txakolindegian burutu den ekitaldian.

Bizkaiako Ahaldun Nagusiak azaldu duenez, “iruzur argi horren aurrean, Jaurlaritzak jarrera anbiguo eta nahasgarria euki dau. Izan be, Jaurlaritzak ezelango zalantza barik defenditu beharko leukez gure produktua eta gure upeltegiak”.

“Bizkaian eta Euskadin, herri-administrazinoak beti egon gara sektoreko profesionalen alboan. Eurekaz egon gara barrikuntzarako eta kalidaderako bidean, eta txakolina merkadu barrira zabaltzeko bidean. Nire esku dagoan guztia egingo dot marka hau babesten segiduteko. Izan be, ez daigun ahaztu, txakolina produktu osogarria be bada, eta gure lehen sektoreari bizirik irauten laguntzen deutso. Ganera, gure garapen iraunkorrerako funtsezkoa dan nekazaritza eta abeltzaintzako lanbideari eusten be laguntzen dau”.

Amaitzeko gaineratu du baita “ogia gaurko, baina baita biharko be. Enplegua gaurko eta biharko. Gure interesak defendidutea, kanpoko mehatxuen aurrean. Hori da gure oraingo eta geroko garapenaren gakoa”.