Euskadiko Osasun Itunaren hirugarren fasearen “arrakasta” ospatu du gaur EAJ-PNVk, kontsentsu zabal batez onetsi baitira Euskadin etorkizunera begira izango dugun osasunbidearen 24 ildo estrategikoak. Neurri horiek jarriko dira abian eta Mahaiak egingo die beharrezko jarraipen eta ebaluazioa.

Aitor Esteban Euzkadi Buru Batzarraren presidenteak arlo horretan egin den lan guztia txalotu du, eta ildo beretik nabarmendu duenez “euskal gizarteak Osasun zerbitzua hobetzeko egin digun eskariari erantzun diogu”. “Konpromisoa eta erantzukizuna eskaintzen dugu gure Herriaren ongizatearen zerbitzura”, esan du. Halaber, Estebanek  Euskadiko Osasun Itunaren lanketan parte hartu duten entitate sozial eta politikoei, sindikatuei eta osasun alorreko eragileei eskertu die aldi honetan eginiko ahalegin guztia.

Mahai honetan EAJ-PNVren ordezkaria izan da Jon Aiartza eusko legebiltzarkidea, eta pozik agertu da Bilbon Euskadiko Osasunaren Itunaren batzarra amaitutakoan. Aiartzak bere aldetik berretsi du talde jeltzaleak bere egiten dituela akordioa eta jasotzen dituen neurriak. “Euskadiko Osasunaren Ituna arrakasta bat izan da. Orain abian jarriko dira itunean adostutako ildo estrategikoak, datozen urteotan ere Osasun Sistema Publikoa hobetzen jarraitzeko. Gainera, laugarren fasean, neurriak jarriko dira martxan eta horien jarraipena egingo da”, ziurtatu du.

EAJ-PNVk bere egin du eta izenpetu egin du gaur bertan onetsi den akordioa, Euskadiko Osasun Sistema publikoak Europako publikoena izaten jarrai dezan  eta lankidetza pribaturako egun bideratzen den % 5,6ko portzentajea ez igotzeko konpromisoari eutsiz. Talde hau 500 lagunek osatu dute, gehien bat teknikariek eta adituek. 10 hilabeteko lana egin dute esandako ildo estrategiko horiek ezartzeko. Diagnostiko eta hausnarketa dogmatikoekin jarraituz Itunaren onarpena atzeratu nahian dabiltzanen aurrean, EAJ-PNVk lanean jarraitzen du neurriak onartzeko eta martxan jartzeko eta Euskadiko Osasun Sistema Publikoa indartzen jarraitzeko, zeina talde jeltzalearen Eusko Jaurlaritzak sortu eta 1984an martxan baitzuen euskal hiritargoari ahalik eta zerbitzurik onena emateko borondatearekin.