Meñakako EAJ-PNVk herriak pairatzen duen paralisia salatu du, “EH Bildu ez delako betetzen ari Meñakarekin agintaldi planean hartutako konpromisoak”. Azaldu dutenez, “legegintzaldiaren erdia baino gehiago igarota, nabarmentzen ziren proiektu nagusiek benetako aurrerapenik gabe jarraitzen dute, plangintzarik gabe eta esleitutako baliabiderik gabe".

Talde jeltzalearen hitzetan, “EH Bilduk espektatiba asko sortu ditu, baina plangintzarik ezak eta erabakirik ezak atzerapenak, espazioen narriadura eta udalerriarentzat galdutako aukerak ekarri dituzte”.

Hartu zituzten konpromisoen artean, Goikoabadene nabarmendu behar da, “erabilera anitzeko espacio” gisa agindu zena, “planifikatzen ez duen eta betetzen ez duen” kudeaketaren adibiderik nabarmenena bihurtu dena.

Goikoabadene: konpromiso abandonatu baten adibiderik onena

Goikoabadene, historikoki herriko abade-etxea izan dena, Udalak erosi zuen 2018an udal talde guztien babesarekin, herriarentzako aukeratzat hartu baitzen. Meñakako EAJ-PNVtik ohartarazi dutenez, “hauteskunde programan, EH Bilduk esplizituki jaso zuen udal ikastaro, tailer, hitzaldi eta jardueretarako birgaitzea”.

“Gaur, legegintzaldia hasi eta ia hiru urtera, ez dago proiektu teknikorik, ez dago egutegirik, ez dago aurrekonturik, eta ez da gutxieneko esku-hartzerik egin, ez udalak erabiltzeko, ez eta haren narriadura geldiarazteko ere. Ez da aurrerapausorik ez egotea bakarrik: Aurrera egiteko asmorik ere ez dago”, adierazi dute jeltzaleek.

Horren ildotik, Meñakako EAJk gogorarazi du 2025ean ohartarazi zuela egoera hori, eta ez dela “bete gabeko konpromiso bakarra”. Azpimarratu dutenez, “jolasgunea eta frontoiaren alboa estaltzea, rokodromoa eta padel pista sortzeko, edo udaletxe aurreko plaza egokitzea, egingo zutela hainbeste iragartzen baitzuten, geldirik jarraitzen dute”.

“Herritarrek argitasuna, zorroztasuna eta norabide zehatza merezi dute. Iragarritako eta bertan behera utzitako proiektu gehiagorik ez. EH Bilduk promesten du, espektatibak sortzen ditu eta, ondoren, ez du exekutatzen. Meñakak planifikatuko duen, kudeatuko duen eta beteko duen gobernu bat behar du; eta hori ez da EH Bilduren eskuetan gertatzen ari”, esan dute jeltzaleek.