Abadiñoko EAJ-PNVk EH Bilduk eta AIBko Gobernu taldeari “erantzukizunez, plangintzaz eta azkartasunez” jokatzeko eskatu dio, udalerrian uholdeak izateko arriskua murrizteko proiektuaren 2. fasea martxan jartzeko. Herritarren segurtasunerako eta herriaren etorkizuneko garapenerako lehentasunezkotzat jotzen den jarduera da.

Alderdi jeltzaleak gogorarazi du proiektua aurreko legealdian bultzatu eta adostu zela EAJ-PNVren Alkatetzapean, Abadiñoko arazo historiko bati erantzuteko egindako lan instituzionalaren ondorioz. Horren ildotik, akordioa zalantzan jarri zutenak (EH Bilduk kontra bozkatu zuen eta akordioa “zitala” eta “bahiketa” dela esan zuen) gaur bere garapena moteltzen ari direnak izatea deitoratu dute.

EAJ-PNVk azpimarratu duenez, Udalak 1. faseari ekiteko behar diren lurzoruak eta baimenak kudeatu dituen bezala, gaur egun gauzatzen ari dena, 2. fasea aktibatzeko beharrezko kudeaketak atzerapenik gabe egiteko betebeharra du. Horien barruan sartzen da lursailen erabilgarritasuna, bai eta obrak kontratatzeko ezinbestekoak diren lizentziak eta administrazio-baimenak lortzea ere.

Hala ere, Gobernu-taldeak azken osoko bilkuran adierazitakoaren arabera, kudeaketa horiek oraindik ez dira hasi. “Onartezina da Udal Gobernuak berak 2025-2026ko bere Legealdi Planean sartu zuen lehentasunezko jarduera baterako plangintzarik eta egutegirik ez egotea, eta hori beteko ez duenik”, salatu dute EAJ-PNVtik.

Alderdi jeltzaleak ohartarazi du atzerapen horrek herritarren segurtasuna ez ezik, ondasunen babesa eta udalerriaren hirigintza-garapena ere arriskuan jartzen dituela. “Esku-hartze hori funtsezkoa da Hiri Antolamenduko Plan Orokorraren berrikuspenean aurrera egiteko eta Abadiñoko hazkunde ordenatu eta segurua bermatzeko”, gaineratu dute.

Era berean, EAJ-PNVk Uraren Euskal Agentziaren (URA) prestasuna nabarmendu du, proiektuarekiko konpromisoari eusten baitio, eta Udalaren esku utzi du erabakitzeko egiteke dauden faseetatik zein gauzatu behar den, hiru fasetan egituratutako jarduketa integral baten barruan. Gogoratu behar da, 2023an lortutako akordioaren arabera, URAk osorik finantzatzen duela 1. fasea, eta gainerako bi faseak, berriz, %50ean kofinantzatuko direla Udalaren eta agentziaren beraren artean.