Lemoizko EAJ-PNVk Antxon Abaroa Egurrola aukeratu du, aho batez, 2027ko udal hauteskundeetarako alkategai. Erabakia maiatzaren 18an egindako Asanbladan parte hartu zuten afiliatu guztiek babestu zuten, “Lemoizekin eta lemoiztarrekin konprometitutako proiektu sendo eta hurbil” batekiko konfiantza berrituz.

Etapa berri honi aurre egiteko, Abaroak udal-ibilbide zabala du eta azken urteetan Lemoizko Udalean egindako lan guztiaren ondorioz esperientzia aberatsa du. Hautagai jeltzalea 12 urtez izan da zinegotzi, Unai Andraka eta Iñaki Alonso alkateekin batera, eta, legegintzaldi honetan, oposiziotik, herritarrak entzun eta udalerriko benetako beharrei erantzuten dien proiektua defendatzen jarraitu du.

“Helburua lemoiztarren konfiantza berreskuratzea da, eta Lemoiz bultzatzen jarraitzeko alternatiba serioa, hurbila eta prestatua dagoela erakustea”, dio Abaroak, eta lehentasunezkotzat jotzen du “auzokideen benetako kezkak erdigunean jartzea”.

Hautagai jeltzaleak bereziki azpimarratu nahi izan du udalerri osoan modu orekatuan lan egiteko beharra. “Lemoiz Andraka, Armintza eta Urizar dira, baina baita Berreaga, Orabille eta gure herriaren parte diren txoko desberdinak ere. Gertuko Udal batean sinesten dugu, udalerriko auzo eta eremu guztiak berdin entzun eta guztien alde berdin lan egingo duen Udala”, azpimarratu du.

Ildo horretan, gertutasunean, entzute aktiboan eta etengabeko lanean oinarritutako kudeaketa eredua defendatzen du Abaroak, fokua herritarren benetako beharretan eta udalerriko auzo guztien garapen orekatuan jarriz. “Gure lehentasuna beti izango da Lemoiz eta bere jendea. Udal-politika gure auzoetako bizi-kalitatea hobetzeko eta guztiontzako aukera gehiago eskainiko dituen etorkizuna eraikitzeko eguneroko konpromiso gisa ulertzen dugu”, gaineratu du.

Hala, datorren urteei begira, Lemoizko EAJ-PNVren helburua argia da, lemoiztarrekiko gertutasunean, konpromisoan eta esperientzian oinarritutako alternatiba indartsu bat sendotzea.