Erandioko EAJ-PNVk aho batez aukeratu du Jon García Agirre 2027ko udal hauteskundeetan Alkatetzarako hautagai izateko. Astrabudua, Erandio Bekoa eta Erandiogoikoko uri batzarrek egungo bozeramaile eta lehen alkateordearengan jarri dute konfiantza proiektu jeltzalearen gidaritza har dezan, eta bereziki nabarmendu dituzte Erandioren alde erakutsi dituen “lana, ardura eta konpromisoa”.

García Agirreren hautaketa udal-kudeaketarako bereziki zorrotza izaten ari den agintaldi batean etorri da. Herritarren beharrak gero eta premiazkoagoak dira, eta udalerriaren orainari zein etorkizunari bete-betean eragiten dieten erronkei erantzuten jarraitzeko beharra ere gero eta handiagoa da.

Jarduera ekonomikoa sustatzea, enplegua sortzea, prestakuntza, gazte eta nerabeentzako aisialdi-aukerak edota Erandio hiri hezitzaile gisa garatzea dira erronka horietako batzuk. Horiekin batera, udalerri atseginago baterantz aurrera egitea ere bada helburua: Erandio garbi, txukun eta zaindua eraikitzea, elkartzeko eta aisialdirako gune egokiak sortzea eta auzoetan komunitatea sendotzen lagunduko duten jarduerak sustatzea.

Testuinguru horretan, García Agirrek ardura nabarmena du gaur egun udal-gobernuan: lehen alkateordea da, Gazteria, Euskara eta Kirol zinegotzia, eta Herritartasun arloko koordinatzailea.

Hautagaiak berak argi ditu datozen urteetan lanean jarraitzeko lehentasunak: “gazteria, gizarte-arloa, kultura, euskara eta kirola; eta, jakina, auzoak, hiri-berroneratzea, etxebizitza eta kaleen mantentze-lanak”.

Udal-kudeaketan pilatutako esperientzia eta Erandioko eguneroko errealitatearekiko lotura estua uztartzen ditu García Agirreren hautagaitzak. Astrabuduko bizilaguna da, eta udalerriko gizarte eta kirol-bizitzan aktiboki parte hartzen du, bai kirolarekiko duen zaletasunaren bidez, bai herriko elkarte-sareak antolatutako jarduera eta topaketetan parte hartuz.

Hezkuntzari eta kirolari lotutako prestakuntza

Jon García Agirre euskalduna da eta Lehen Hezkuntzako graduduna. Horrez gain, Hezkuntza Zentroen Kudeaketa eta Zuzendaritzako Masterra, Kirol Instalazio eta Erakundeen Kudeaketa eta Zuzendaritzako Masterra eta Pedagogia Terapeutikoan Aditu Graduondokoa ditu, baita Gorputz Hezkuntzako eta Ingeleseko aipamenak ere.

Gaur egun Udalean dituen ardurak hartu aurretik, Erandio Kirolaken lan egin zuen. Halaber, hainbat ikastetxetan jardun zuen irakasle, tutore, Gorputz Hezkuntzako irakasle, Euskara irakasle, pedagogo eta terapeuta lanetan.

Jon García Agirre aho batez hautatuta, Erandioko EAJ-PNVren hiru uri batzarrek 2027ko hautagaitzaren burua zehaztu dute, eta herritarren egunerokoarekin lotura zuzena duten gaiak jarri dituzte proiektuaren erdigunean: auzoak, etxebizitza, hiri-berroneratzea, gizarte-politikak, gazteria, kirola, kultura eta euskara.