Lau mila lagun inguru bildu dira gaur, Bilboko Euskalduna Jauregian, Josu Jon Imaz EBBren presidenteak eta Juan Jose Ibarretxe lehendakariak jelkide bizkaitarrekin izan duten topaketan. Jendetza hura aurrez aurre zutela, Imazek esan dio Lehendakariari: “Indar guzti hau zure zerbitzura dozu. Zure atzean dago. Otsailaren batean, eguerdian, Kongresura sartu aurretik izan genuen azken elkarrizketan, gogoratuko duzu nola esan nizun: Hor goian zaudenean ez zara bakarrik egongo. Jende asko izango dozu energia eta indarra bidaltzen. Milaka eta milaka euskaldun izango dituzu bultzaka telebistaren atzean. Sentitu al zenuen? Hemen dauden guztion indarra han zegoen. Eta emaitza ikusita, harro sentitzen gara. Eskerrik asko lehendakari. Gure bihotza, gure herria eta gure nahia, bikain ordezkatzeagatik”.

Bizkai Buru Batzarrak antolatutako ekintza honetan, 24.000 alderdikide eta 124 Uri Buru Batzarren laguntza jaso du Ibarretxe lehendakariak, Iñigo Urkullu BBBren presidentearen eskutik. Imazek esan duen bezala: “Zure atzean alderdia duzu Lehendakari. Hemen dauden 124 Uri Buru Batzarrak atzean dituzu bultzatzeko prest. Zugaz gagoz Lehendakari”.