Kontua da sei hil honeetan Eusko Alderdi Jeltzaleak antolatu dauan hausnarketa foro honetatik 1.000 pertsona baino gehiago igaro dirala, 12 lan taldetan banatuta, eta makina bat gai eta konturi buruzko hausnarketea egin eta euren esperientziak konparau dabezala. Aztertu eta landu diran gaiak, besteak beste, honeek izan dira: aukera bardintasuna; barrikuntzaren eta ezagutzaren gizartea; gazteria; gizarte ekintza; osasuna; hezkuntza; garapenerako lankidetza; lurraldearen antolamendua eta garapen iraunkorra; ekonomi ituna; euskerea; eta kulturea eta kirolak. Planak aise gainditzen dau 4 urteko helmugea. Askoz be ausartagoa dan proiektua dogu, erakundeek landu behar dabezan ildo nagusiak eta ardatzak zeintzuk diran zehazteko ahalegina egiten dauana, baina ez bakarrik gure gizartearen garapen eta ongizate mailak bermatzeko, egoera horreek hobetzeko eta gainditzeko baino. Gure helburua oso argia da, 2015ean Bizkaia erregio aitzindarietakoa izatea Europan garapen sozio-ekonomikoaren eta giza garapenaren arloetan. Benetan uste dot inoiz Bizkaian gizarteagaz batera egin dan hausnarketarik garrantzitsuena, konpartiduena eta adostuena dala.