2007ko maiatzeko hauteskundeetarako foru-egitaraua aurkezteko Bilbon komunikabideen aurrean egindako agerpenean, Urkulluk hau adierazi du: “Une hauetan proiektuei, ideiei eta ekimenei buruz hitz egitea zaila da”. Izan ere, bere ustez herritarren benetako arazoen inguruko eztabaida “lapurtu” egin dute, ezker abertzalearen zerrendak legez kanpo uztearen edo ez uztearen inguruko gaian arreta jartzeko.

“Hauteskundeetarako hilabete baino gutxiago geratzen da, eta, berriz ere, proiektuen, ideien eta ekimenen aurkezpena baldintzatua dago. Komunikabideek eztabaida lapurtzen dute, eta badirudi eguneroko bizitzari eragiten dieten eta gizarte eredua osatzen duten gaiak herritarrei ezagutaraztea baldintzatu nahi dutela”, adierazi du.