Adierazpen horiek EAJk Bilbon Espainiako Kongresurako eta Senaturako hautagaiak aurkezteko ekitaldian egin ditu Ortuzarrek; hain zuzen ere, azken orduetan ezker abertzaleko buruzagiak atxilotu izanaren inguruko iritzia eskatu diotenean.

EAJren buruzagiak nabarmendu duenez, azken orduetan euskal politikaren bi aurpegiak azaleratu dira beste behin ere. «Euskal politikaren aurpegi zatarra ikusi dugu berriz ere manifestaldiak debekatzearekin, atxiloketekin, ekintza bandalikoekin, kale borrokarekin eta ezker abertzaleak kontrako jarrerei aurre egiteko erakutsitako demokratikotasun eskasarekin», salatu du Ortuzarrek.

Horiek horrela, hurrengoa ere gaineratu du EAJko buruzagiak: «Garzoni eta Zapaterori belarrondokoa emateko, euskal herritarren aurpegia jo dute, euskal herritarrak izan baikara ezker abertzalearen haserrea pairatu dugunak, eta ez botere zentrala edo justiziaren goi hierarkia. Beste behin ere, Bilboko kaleetan paseatzen ari ziren herritarrak, alderdi politikoen egoitzak, zerbitzu publikoak eta hiri-altzariak izan dira azkenean kaltetuta suertatu direnak».