Radio Euskadin eginiko adierazpenetan, buruzagi jeltzaleak esan du lehendakariak herritarrei egingo dizkien bi galderak EAJ-PNVren gustukoak direla. “Bai, noski, lehendakariak iragarritakoaren gauzapena delako”.

Ortuzarrek esan du Zapateroren gobernuak esan duela deialdiaren aurkako errekurtsoa egingo duela Auzitegi Konstituzionalean, baldin eta Eusko Legebiltzarra beraren alde agertzen bada. “Horrek ez du Espainiako Gobernua leku onean uzten, autoritarismo kutsua ematen diolako. Planteatu dena ez zaio gustatzen, eta horregatik mekanismo jurisdikzional eta judizialetara joko du, elkarrizketa politikoaren bidea ukatuz. Gainera, batzuentzat irekitzen dute eta besteentzat itxi. Ez dugu ulertzen hirukoak ze bekatu egin duen berarekin ez beste guztiekin hitz egiteko.”