Ortuzarrek, “printzipioz”, baztertu egin du hauteskundeak aurreratzeko aukera eta kontsulta debekatzen badute, legearen barruan jokatuko dutela baieztatu du. Dena den, “Zapateroren itxikeriari erantzun irmoa” emango diote.

ETBri eskainitako elkarrizketan, EAJk alderdi instituzionala dela argi duela eta legea gustatu edo ez, legeari eta legeak ezarritako prozedurei atxikitzen zaiela adierazi du Bizkai Buru Batzarreko presidenteak.

Hala ere, zehaztu du prozedura horiek erabili egingo dituela EAJren jarrera zilegia eta demokratikoa izateaz gain, juridikoki bideragarria dela frogatzeko. «Baina legea bera eta legeak ezarritako prozedura judizialak errespetatzeak ez du esan nahi EAJ garen aldetik gustatzen ez zaigunari eta bidegabea iruditzen zaigunari erantzun politikoak emateko eta kritika politikoak egiteko aukerarik ez dugunik», jakinarazi du.