«Euzko Alderdi Jeltzaleak oso argi du aireportu hau, eta Euskadiko gainerakoak, Euskadiko gure erakundeek kudeatu beharko lituzketela», nabarmendu du Ortuzarrek. «Izan ere, hartu ditugun eskumen guztiak hemen Madrilen baino hobeto kudeatzen ditugula erakutsi diegu. Eta edonork konpara ditzake datuak. Guk adierazi nahi duguna zera da: gure aireportuak kudeatzeko eta antolatzeko prest gaudela, eta erronka horri aurre egin nahi diogula. Baina ez da posible izan, Espainiako Gobernuak ez digulako eskumen hori transferitu nahi».

Buruzagi jeltzalearen ustez, Bizkaiko Alderdi Sozialistaren jarrera, bereziki, idazkari nagusi Pastor jaunarena, adar jotzea da. Ez dituzte babesten inguruko udalen alegazioak, ezta biztanleek aurkezten eta nahi dituzten neurri zuzentzaileak ere. «Aurpegia eman behar denean eta bozkatu behar denean, Espainiako Gobernuaren ordezkari gisa jarduten dute. Hau da, uko egiten diete neurri zuzentzaileei, Madrileko Gobernuak ekarpen ekonomikoa egin behar badu inguruko biztanleen mesederako», gehitu du.