"Baina, era berean, ospatzeko eguna ere bada. Iaz esaten genuen inoiz ez zela izan oraingoa moduko Euskal Aberririk. Eta oraingo honetan ere , errealitate hori ikusten dugu, gaurko inguruabar politiko guztien gainetik. Euskadi, gaur da inoiz izan den aberririk sendoena; eta, aurrera egiteko bide honetan, Euskal gizarteak ez du atzera pausurik sekula onartuko. Horregatik, Euskadi Euskaldunon Aberria dela sinesten dugunok arrazoiak soberan ditugu datorren igandekoa gogoan hartzeko eta ospatzeko" gaineratu du.

Ortuzarrentzat, "gu, EAJ-PNVko abertzaleok, Bilboko Plaza Berrian bilduko gara. Goizeko hamaika eta erdietan izango da ekitaldi politikoa, eta bertan izango dira Ibarretxe Lehendakaria eta Iñigo Urkullu EBBren presidentea. Gero, lagun arteko bazkaria izango dugu, inoizko arrakastarik handiena izan duen bazkaria hain zuzen. Geroago,  dantzaldia izango dugu Joselu Anaiak taldearekin Arriaga plazan; eta, kirola gogokoago dutenentzat pantaila erraldoia egongo da Osasuna eta Athletic-en artean jokatzekoa den partida ikusteko; hau,kirol aukera paregabea da Aberri Egunerako ere. Bezperan , larunbatean, Euskadiko hainbat menditan kontzentrazioak eta ibilaldiak izango dira Ikurriña gure Herriko tokirik altuenetan jartzeko eta ohitura zaharrari eusteko".

"Aurtengo Aberri Eguna, Euskal Autonomi Erkidegoko hauteskundeen eta hurrengo Europar Legebiltzarrerako hauteskundeen artean kokatzen da. Datak beraz, izaera politiko nabarmena du. Aukera ederra da EAJ-PNVk Euskadirekin eta Euskal gizartearekin duen konpromisoa berresteko. Dauden tokian daudela, Jaurlaritzan zein oposizioan, Euzko Alderdi Jeltzalearen emakume eta gizonok gure hitza  eta gure lana ematen dugu egunez egun Euskal Aberria eraikitzeko. Garen guztia ematen dugu Euskal Autonomo Elkartean orain arte lortu dugun autogobernua babesteko eta sendotzeko. Garen guztiz ematen dugu Nafar guztiek beren euskaltasuna askatasun osoz egikaritzeko aukera izan dezaten, eta Iparraldeak instituzio mailako onarpena lor dezan izate  politiko eta administratiboa den aldetik".