Fadurak bizi duen itxuraldatzearen irudirik adierazgarriena da egoitza nagusiko atondoa, batzar aretoa, kirol kantxa eta igerilekuenak osatzen dutena, Getxoko alkate Imanol Landak gaur nabarmendu duenez. Alkateak esan duenez, "2008ko uholdeek Faduran utzi zuten egoera zaila benetako aukera bihurtu dugu gure kirol instalazioak berriztatu eta horiei kirol jardueraren eremuan gure auzokideek dituzten beharrei erantzuteko behar zuten bultzakada emateko".

Getxoko alkateak azaldu duenez, dagoeneko hasi den hirugarren eta azken fasean, atletismo pistaren zaharberritzea egingo da (1.300.000 euro bideratuko dira horretara), errugbi zelaian argi berriak ipiniko dira eta zenbait egokitze lan ere egingo da (390.000 euro) eta hondarrezko futbol zelaia kendu eta belar artifizialeko gunea egokituko dute, era askotako jarduerak egiteko (232.000 euro). Horrez gainera, aurten Bolua I eta II futbol zelaietako belar artifiziala aldatzeko asmoa dago, baita zelai hauen itxitura metalikoaren ordez plastikozko bat ipintzea ere.