Arrankudiagako haurreskola berria udazkenean irekiko da hamabi umerentzako tokia eskainiko duelarik. Zabalik dago jada izena emateko epea eta horrela egongo da ekainaren 11ra arte. Dena dela, iraila eta urrirako ere aurreikusten da izena emateko epea irekitzea.

Haurreskola Elexalde enparantzan guztiz berriztatua izan den lokalean egongo da, herriko eskolen ondoan. Inbertsioa 234.000 eurokoa izan da eta hainbat diru laguntasun jaso ditu, besteak beste Bizkaiko Foru Aldundiaren eta E Planetik eratorri diren diruetatik. Arrankudiagako udalak ere egin du bere ekarpena.