Garbigune mugikorrean Getxoko auzotarrek hondakin toxikoak zein orain arte birziklatzen ez ziren beste hondakin batzuk ere utzi ahal izango dituzte. Hala nola, olioak; pintura, laka eta berniz hondarrak; fluoreszente eta lanparak; iraungitako sendagaiak; hondakin elektronikoak; izotz-kontrakoak; disolbatzaileak; hidrokarburo hondakinak; toner/tinta-kartutxoak; CDak eta elektratresna txikiak (mikrouhin-labeak, irratiak, ...), besteak beste.

Garbigune mugikorra ostiral arratsaldetan izango da, 18:00etatik 21:00etara, Areetako Geltoki plazan; larunbat goizetan, 10:00etatik 14:00tera, Algortako Geltoki plazan; larunbat arratsaldetan, 18:00etatik 21:00tara, Bidezabalgo anbulatorioko plazan; eta igande goizetan, 10:00etatik 14:00tara, Iturgitxi Parkean, Villamonte aldean. Emaitzak onak badira, ondoren garbigune mugikorra beste auzo batzuetara ere eramango dute.

Alkateak, Imanol Landak adierazi duenez, Udalak urrats berria ematen du birziklapena sustatzeko estrategian eta Getxon jasangarritasunaren aldeko lanean, Garbigunea auzo desberdinetara hurbilduz. Landaren iritzian, garbigune mugikorra aipatu estrategiarentzat erantzunik egokiena da, "uste baitugu ezin dugula jarraitu herria edukiontziz betetzen, erraz ibiltzea oztopatzen baitute, aparkaleku kopurua murrizten baitute eta beren gestioan ere trabak eragiten baitute, ez baitira denak modu eta denbora berdinean betetzen. Garbigune mugikorra erantzunik egokiena da traba horientzat".