EHU/UPVren Euskobarometroko taldeak sei hilerik behin egin ohi duen azterketak maiatzaren 27tik eta ekainaren 17ra bitartean beren etxeetan elkarrizketatuak izan diren 1.200 pertsonen iritziak biltzen ditu; bertan islatuta geratu dira oraingo euskal Exekutiboaren jardueraren kontrako irizpideak. Era berean, euskal hiritargoaren % 67k esan du ez dagoela ados, sozialista eta popularrek Patxi Lópezek zuzentzen duen Gobernuari egonkortasuna emateko itunarekin; hau da, bosteko bakoitzetik bat baino ez da itun horrekin ados dagoena.

Deigarri gertatzen diren beste batzuk hauek dira: euskal hiritarren % 71k dio krisialdiaren eragina nabaritu egin dutela eta ondorioz enpleguagatiko kezka 7 puntutan igo da; bestetik ere, % 54k Auzitegi Gorenak Sorturen inguruan hartutako erabakia gaitzetsi du eta biztanleriaren % 64k Auzitegi Konstituzionalak Bildu legalizatzeko hartutako erabakia onetsi du; %36k independentzia gogo handiak adierazi ditu ,horretarako gogo eskasik edo bat ere ez duen % 55aren aurrean.