Burukide jeltzalearen aburuz, Bilduri ez zaio eskatu behar “ETAren aurrean ausart eta argi jokatzeko”, Ezker Abertzaleari baizik; hainbestez, Ortuzarren ustez, PSOE eta PP “oker dabiltza”, Bildu koalizioa “abaguneko gaietan luparen pean” jartzen ari baitira. 

Ortuzarrek adierazi duenez, José Luis Rodríguez Zapatero Espainiako  presidenteak Gobernutik joan aurretik hizpatutako transferentziak emango dituen hitza eman dio EAJri, eta esan du Ibarretxe Plana “erreferentzia bat” dela, Euskadirentzat estatus politiko berria ezartzeko EAJk egin duen proposamenari doakionez, baina Plan hori “galbahetik pasatu” eta arreta handiz aztertu behar dela.