Radio Euskadi-ri eskainitako elkarrizketa batean, buruzagi jeltzaleak bere iritzia eman du, joan den igandean PSOEk iragarri ostean Alfredo Pérez Rubalcabak bere hauteskunde-programan “aberatsentzako zerga-igoera" sartuko zuela.  “Premisa horiek oinarri hartuta berba egiteko prest gaude, baina ezin da gaur ateraldi bat izan eta bihar beste bat”, ohartarazi du Ortuzar-ek. Horrez gain, esan du uda honetan Patxi López lehendakariak zerga-arloan planteatu duen proposamena ere "ateraldia" dela.

Ortuzar-ek adierazi du berak ez lukeela zerga-arloa ukituko “hainbesteko zarata dagoen baldintza hauetan, elektoralismoa egiten ari delako”. Horrez gain, ohartarazi du azken zerga-erreforma, 2008koa, "herenegungoa" dela, eta azaldu du egiten den edozein zerga-igoerak, izapidetzeko eta indarrean jartzeko behar diren epeak direla-eta, ez duela diru-sarrerarik sortuko "2012ko amaierara arte edo 2013ko hasierara arte".