“Euskadiren aldeko konpromisoa ere bi alde desberdinetatik garatu dugu: garapen teknologikoaren aldetik eta autogobernuaren aldetik. Garapen teknologikoa guretzat berebizikoa da. Espainiaren baitan Euskadi, teknologi mailan, punta-puntako delako eta guretzat beharrezkoa delako teknologiaren aldeko apustua egitea krisitik ateratzeko” azaldu du.

Bestetik autogobernuaz ere mintzatu da. “Arlo honetan, lorpen historikoak burutu ditugu; Ecofinen parte hartzea, Kontzertu ekonomikoaren blindatzea. Orain hainbat tresna ditugu krisialdiari aurre egiteko. 18 transferentzi lortu ditugu eta horietariko batzuk historikoak dira lortu ezinezkoak izan direlako urte askotan eta momentu kritiko honetan oso eraginkorrak izan daitezkeelako (adibidez, teknologia eta ikerketei buruzko transferentziak, enplegurako politika aktiboak...)”.

Autogobernuari dagokionez ere autodeterminazioaz aritu da eta azaldu duenez, azken legegintzaldi honetan bi aldiz planteatu du EAJ-PNV Euskal Taldeak gai hau Diputatuen Kongresuan. “Norbaitek uste badu beste legealdi batzuetan autodeterminazioa izatea bere programaren puntu bakarra, jai dauka, izan ere, ez dut uste ezer lortuko duenik. Guk autodeterminazioaren defentsa askotan bultzatu dugu eta ez dugu, oraindik, ezer lortu”.