Atxondoko EAJ-PNVk hurrengo osoko bilkuran eztabaidatzeko mozioa aurkeztu du, eta bertan adierazten denez “egoera ekonomiko larria eta gure udalaren are egoera larriagoa dela kontuan hartuta, Hirigintza eta lanak eta Ingurumen batzordeak bat egitea proposatzen dugu. Jarduera biak herrialdera lotuta daude eta  etengabe  gurutzatzen dira”.

Gaineratu dutenez, “HAPN berrian ingurumenak garrantzi handia du eta Atxondok hurrengo urteotan izango duen eraginik handiena, hau da, AHT, batzorde biotako gai nagusia izango da. Beraz, batzordeak bateratzea ondo dator udal aurrekonturako eta gure auzo lagunen poltsikoetarako, Udala ere krisialdi ekonomikoaz arduratuta dagoela ikusiko dutelako. Hau egin ahal izango da Bildu bere ohiko kontraesanekin jarraitzen ez badu, eta berriz ere esan behar dugu: gauza bat esan eta kontrakoa egiten ez badu”.