Merkatua hileko lehen eta hirugarren ostegunez egingo da goizeko 9:00etatik 13:00era bitartean. Iurretako zein beste herrietatik bertaratutako bizilagunek denetatik erosteko aukera izango dute bertan, hau da, umeentzako arropa, oinetakoak, bitxiak, kirol arropak eta etxerako gaiak. Baserritarren saltokiei dagokionez, bertan bilduko dira Iurreta, Abadiño, Mallabia, Amorebieta eta Durangoko produktoreak, eta bertan salduko dira ortuariak, frutak, ogia, gazta, sagardoa,txakolina eta eztia.

Ekimen honen bidez, Elizateko udalak onurak ahalbidetu nahi dizkie herriko bizilagunei eta bertako merkatariei; lehenengoek erosketak egiteko alternatiba izango dute eta bertako merkatariek bezero berriak izango dituztelako, eta honek salmentetan eragin dezake. Amaitzeko, Durangaldeko baserritarrek ere izango dute hamabostaldian behin beren produktuak eskaintzeko gune berria.