Atutxak Bermeoko Uri Erakundea zoriondu nahi izan du aukeratu duen hautagaiagatik "gaztea da, prestatua, gaitua, sentsibilitate sozialarekin eta ardura politiko handiarekin, zinegotzi izan den urteotan erakutsi digun legez".

Bizkaiko jeltzaleen buruak amaitu baino lehen EAJ-PNVren hautagaiari zuzendutako hitzak esan nahi izan ditu " Berarekin egongo gara eta Bermeoko Uri Buru Batzarrarekin, bermeotarrei ilusioa eta itxaropena bueltatzeko lanean, Bermeo aurrerakoia eta ekintzailea lortzeko, Aritzek eta EAJ-PNVren udal taldeak gobernatutako Bermeo herria. Herri honek merezi du eta izango du".

Aritz Abaroa Bermeoko alkatetzarako EAJ-PNVren hautagaiak bere esker ona adierazi nahi izan du "eskerrik asko nire alderdiari, nigan jarri duen konfiantzagatik. Nire esker ona ere Bermeoko alderdikideei, eurak direlako hautatu egin nautenak eta eskerri asko bermeotarrei, oraingo legegintzaldian beren babesa eskaini digutelako".

Abaroa amaitzeko esan du kargua ilusioarekin hartzen duela "baina baita errespetu eta ardura handiarekin". "Erronkaz eta lanez betetako egoeraren aurrean aurkitzen gara. Jakin badakit herri honek, bermeotar guztiok kalitatezko etorkizuna merezi dugula, eta guri dagokigu errealitate hori egi bihurtzeko egitasmoa garatzea. Argi eta garbi esango dut: bermeotarrok Bermeon bizi,lan eta gozatu nahi dugu, eta horretarako neure buruari jarri diodan helburua izan da erronka horiek guztiak lortzeko aukerak emango dizkigun udalerria eraikitzea".