EBBren presidente Andoni Ortuzarrek parte hartze prozesua eta EAJ-PNVk 2015eko otsailean ospatu nahi duen legezko kontsulta babesten duela adierazi du eta bermatu du talde jeltzaleak Bizkaiko Batzar Nagusietan jardungo duela arauak aldatzeko eta Usansoloren segregazioa ahalbidetzeko, Usansoloko herritarren gehiengoaren borondatea horixe baldin bada.

Ibon Uribe Galdakaoko alkateak Hiritarren Parte Hartzeari buruzko Informazio Batzordean izan diren talde politikoei eman die ezagutzera Usansolo Galdakao udalerritik banatzeko prozesua abian jartzeko "bide orriaren" zirriborroa. Uribek azpimarratu duenez honakoa "bide orri" irekia da, prozesua talde politiko guztien artean partekatua izan dadin. "Ez dugu alde bakarreko erabakia planteatu nahi,baizik eta partekatua" azpimarratu du. Galdakaoko alkateak azaldu duenez "Usansoloko herritargoaren zati handi batek denboran zehar Galdakaotik banatzeko eta udalerri independente bihurtzeko egin duen aldarrikapenaren aurrean, Galdakaoko udalak egoera horri ahal den modurik demokratikoenarekin eta gardenarekin ekin nahi dio, prozesua sinesgarri egingo duten urratsak emanez".

Bide orri honek lau zedarri ezartzen ditu: .

1)    Hiritarren iritzia jasotzeko prozesua hastea, eta herritarrak izan daitezela Usansoloren etorkizuna erabakitzeko eskubidea baliatuko dutenak, Galdakao udalerriaren interesak kaltetu gabe .

2)    Bide horretan,prozesu horretatik sortuko litzateke Batzorde Parekidea osatzeko beharra.Batzorde hori Galdakaok eta Usansolok osatuko lukete, Bizkaiko Foru Aldundiaren aholkularitzarekin, herritarrei behar besteko informazioa eta bideragarritasun ekonomiko eta sozialari buruzko txostena helarazteko .

3)    Lan honen ondorio modura, Aldundiari eta Batzar Nagusiei eskatuko litzaieke une honetan segregazio edo banaketa prozesua eragozten duen foru araua aldaraztea .

4)    Eta, azken zedarri gisa, hiritargoari galdeketa loteslea egiteko prozesua .

Uribek gaurkoan planteatu du EAJ-PNVk hurrengo osoko bilkuran aurkeztuko duen mozioa, prozesua maila instituzionalean hastea suposatzen duena. Zirriborro honetan planteatzen da Udal osoko bilkurak prozesuaren hasiera babestea eta , lan horiek guztiek prozesua eramango dute 2015eko otsailerako aurreikusi den lehen galdeketara. Honakoa izango da galdera: “Usansoloren segregazioa ekar lezakeen azterketa prozesua hastea nahi al duzu?”. Udaleko talde politikoek ostiralera arteko epea daukate beren ekarpenak egiteko. Galdakaoko alkateak adierazi du gai hau azaroaren 27ko osoko bilkurara eramango duela "urrats eraginkor eta sinesgarriak ematen jarraitzeko, gure konpromiso publikoan adierazi dugun moduan".

Zentzu berean EBBren presidente Andoni Ortuzarrek argi eta garbi adierazi nahi izan du EAJ-PNVk eta Ibon Uribe Galdakaoko alkateak prozesu parte hartzailea lideratzeko duten borondate eta erabakimena, Usansoloko herritarrek izan dezaten Galdakaoren balizko banaketaren inguruan duten iritzia emateko aukera , eta borondate hori entzuna eta kontuan hartua izan dadila. Izan ere, Ortuzarrek iragarri du kontsulta hori, Galdakaoko alkateak egin duen ibilbide orriaren arabera 2015eko otsailean helduko dena "hautestontzi gardenekin" egingo dela , " eta ez kartoizko hautestontziekin" . Era berean baieztatu duenez, Usansoloko herritarrek Galdakaotik banatzea erabakitzen badute, talde jeltzaleak Bizkaiko Batzar Nagusietan arauak aldatzeko lana egingo duela, nahi hori gauzatu ahal izateko.

Radio Euskadiri eskainitako elkarrizketan Ortuzarrek azpimarratu egin du Galdakaoko alkateak otsailean kontsulta legalarekin amaituko den parte hartze prozesua abian jarri duela , hau da, hautestontzi gardenekin, eta ez kartoizkoekin; baliagarritasuna duten hautestontziekin, emaitzak lotesleak izango baitira.Usansoloko gehienek, lege barruan egingo den prozesu horri jarraiki, udalerri independente izan nahi dutela esaten badute, guk horren arabera jardungo dugu Bizkaiko erakundeetan arauak aldatzeko" gaineratu du. Bere esanetan " kontsultak ondo egin behar dira, lege barruan, eta oso ondo araututako parte hartze prozesuen barruan". Zentzu horretan, Ortuzarrek azaldu du "benetan" errespetatzen duela igandean 'Usansolo Herria' plataformak deituta egingo den galdeketara bozkatzera joango den jendea, baina bere sentsazioa da antolatzaileek "lasterbideak erabili nahi dituztela" eta "hiritarrei iruzurra egin nahi diotela, eta hori ez da bidea". Ortuzarrek esan duenez "bide zuzena da alkateak eta Aldundiak egingo dutena" hau da, parte hartze prozesu "egiazkoa, arautua eta zilegia" egitea "Prozesu honek behar duen gardentasunarekin. Eta gero, horren arabera jarduteko, hau da, herritarrek esango dutenaren arabera" . Ortuzarrek baieztatu du Usansoloko EAJ-PNVren alderdikideek oso argi dutela igandean zer egin behar den, hau da, bozkatzera joan ala ez.