Horretarako, Berdintasun Arloak udal liburutegiarekin lankidetzan, ipuin kontatzaile bat hartu du 5 eta 8 urte bitarteko neska eta mutilei zuzendutako ipuinak kontatzeko. Halaber, jarduera hau amaitutakoan, familiei zuzendutako gidak banatu dira sexistak ez diren ipuin eta liburuen gaineko informazioarekin, eta liburuak gaika eta adinen arabera sailkatuta.

Zornotzako Udalak azaroaren 25aren kariaz antolatu duen azken eginkizuna ‘Genero bortxakeriaren aurrean ez ezazu orririk pasa’ izenburukoa izan da. Goiburu horrekin azaroaren 29an, 18:00etatik 20:00etara arteko ordutegian, emakumezko aktore bat Amorebieta-Etxano udalerriko kaleetan ibiliko da indarkeria matxistaz kontzientzia hartzen laguntzeko. Bere interpretazioan zornotzarren artean orri-markatzaileak banatuko ditu eta emakumeenganako indarkeriaren aurrean erasorik txikiena ere ez onartzeak duen garrantzia azalduko du.