Errigoitiko EAJ-PNV-ren Uri Batzarrak aho batez erabaki du Mikel Madariaga alkatetzarako zerrenda-burua izatea. Lehen aldia da toki hori hartzen duela, baina duela urte batzuk Busturialdeko herri honetako zinegotzi izan zen. Langile autonomoa da eraikuntza enpresa batean.

Madariagak argi eta garbi esan nahi izan du Udalaren egoera ekonomikoa ez dela oso ona. "Ahalegin handia egin beharko dugu herri honek dituen baliabideak suspertzeko eta aktibatzeko. Hori lortzeko lana egingo dugu eta, gure erronketako bat da Malluki industrialdea osatzen duten udal lurrei bideragarritasuna ematea".

Bere esanetan, hauteskundeetan aurkeztuko duen egitasmoaren beste helburua dela udal lokaletako jarduera berreskuratzea. "Aterpe etxeaz ari gara, gaztelekuaz, tabernaz. Lana ez dugu faltako, baina gogotsu gatoz. Errigoitiren alde lan egiteko prest gauden pertsonak gara. Errigoiti herri hobea egiteko konpromisoa hartu dugu, herri batuagoa, herritarrak herriaz harro egon daitezen, bereziki gazteak eta nagusiak, horiek oso arreta berezia emango diegun gizarte taldeak direla ahaztu gabe".

"Gure herriko nekazal giroa bakarra da, zuzenean baloratzen hasi behar dugu, nekazal inguruarekin zerikusia duten jarduerak sustatu behar dira. Horretan ari gara, uste dut hurrengo hilabeteotan gai hori hobeto ikusten hasiko garela. Erronka berria da eta lan handia eginez lortuko dugu aurrera ateratzea. ‘EAJren estiloa’ deitzen dena", esan du alkategaiak.

Madariagak bere 8 urteko alaba "etxeko nagusia" dela esan du. Berarekin eta emaztearekin asteburuak aprobetxatzen ditu betiko lagunekin Errigoititik ibiltzeko. "Athletic zale sutsua naiz eta aurten argi daukat bi erronka izango ditugula: EAJ-PNV-k Errigoitin irabaziko du maiatzaren 24an eta, astebete geroago, Athletic-ek Bartzelonan irabaziko du. Herrian txalupa eta Bilbon gabarra aterako ditugu" esan du alkategaiak irribarretsu.