Orlan Isoird izango da, hirugarrenez, Berrizko EAJ-PNVk 2019ko hauteskundeetan aurkeztuko duen alkategaia. Hala erabaki du gaur arratsaldean Berrizko EAJ-PNVren uri batzarrak, Isoird proiektu jeltzalea hauteskundeetara eramango duena izatea hirugarren aldiz erabaki duelarik.

Soziologian lizentziatua da eta bere helburu nagusia da “Berrizek aurrera egiten eta hobetzen jarraitzea herria egiten duten herritar guztien onerako”. Berrizko hautagaia jabetuta dago oraindik asko duela egiteko. “Azken urteotan ibilbidearen zati bat egin dugu, baina oraindik hainbat proiektu geratzen zaizkigu Berrizek bere herritarren bizitza kalitatea hobetzen jarrai dezan. Jardun horretan inbertzitzen jarraituko dugu gure lana eta agintaldi honetan geratzen zaigun denbora eta, herritargoak gure proiektua aukeratzen badu, bide beretik jarraituko dugu”, baieztatu du.

Agintaldi honetako proiektuen artean azpimarratu ditu Iturritza kalea hobetzeko lanak, herriguneko irisgarritasun egokia bermatzeko egitasmoan jasota daudenak, edo Lorentzo Deunaren baseliza inguruak hobetzeko lanak (herritargoak aurrekontu parte hartzaileetan planteatu zuen eskarietako bat). Halaber, era berean azpimarratu behar da proiektu sozio-kulturalei eta euskarari ematen zaien babesa eta laguntza.