Bilboko Udalak, Eusko Jaurlaritzak eta Madrilgo Gobernuak sinatu dute gaur arratsaldean, abiadura handiko trena hirira ekartzeko bidean aurrera egitea ahalbidetuko duen funtsezko protokoloa.

Sinatutako protokoloak argi utzi du alderdiek Abandoko geltokiaren eraikuntza eta lurpeko integrazioa, Basauriko behin-behineko geralekua barne, modu koordinatuan garatzeko asmoa dutela, abiadura handia Bilbora helarazteko proiektuaren barruan.

Dokumentua Juan Mari Aburto Bilboko Alkateak, Iñaki Arriola Eusko Jaurlaritzako Lurralde Plangintza, Etxebizitza eta Garraioetako Sailburuak, Raquel Sanchez Garraio, Mugikortasun eta Hiri Agendako Ministroak eta María Luisa Dominguez Trenbide Azpiegituren Administratzailea (ADIF) eta ADIF-Abiadura Handia enpresa-erakunde publikoetako presidenteak sinatu dute.

Aburto Alkatea pozik agertu da “abiadura handiko trenak ez baitu atzerabiderik Bilbon”. “Azkenean, zehatz-mehatz jaso da erakundeen konpromisoa, gure hirian hain luzaz itxaron den behar-beharrezko obra hau aurrera ateratzeko”.

Haren hitzetan, proiektu hau “ona da eta izango da bilbotarrentzat, baita Bizkaia osoarentzat eta Euskadi osoarentzat ere”. “Herritarrek ziurtasunak eskatzen zizkiguten denboran atzeratutako proiektu honen inguruan”. “Orain geure esku dago proiektua arintzea. Herritarrek lehenbailehen ikusi nahi dute obren hasiera, gaur sinatutako akordio hau errealitate bihurtuko dela egiaztatzeko. Bilboko Alkatea naizen aldetik, laguntzen jarraitzeko eta deitzen diguten tokira, bilbotarren interesak presente egon daitezkeen lekuetara joateko konpromisoa hartu dut. Eta horiek aurrera ateratzeko lan egingo dudala hitzematen dut”.

Azkenik, desio bat aireratu du: “Abiadura Handiko Trena lehenbailehen errealitatea izan dadila eta hiria are gehiago kohesionatzen lagunduko digun lurrazpiko geltoki baten bitartez irits dadila”. “Bilbon, Abiadura Handiko Trenaren etorrerak aberastasuna, konpromisoa, konektibitatea, etorkizuna eta modernitatea ekarriko ditu. Eta, batez ere, pertsonen bizi-kalitatea hobetuko du”.

KONPROMISOAK

Izenpetutako protokoloaren arabera, sinatzaileek modu koordinatuan jardutea adostu dute esparru hauetan:

• Abiadura handiko trena Bilbora sartzeko lurrazpiko geltoki berria eraikitzeko informazio-azterketaren eta proiektuaren garapena eta administrazio arloko tramitazioa, hiria garatzeko planekin bat datorren hiri-integraziorako soluzioa osatuz.
• Euskal Y-aren trazaduran behin-behineko geralekua eraikitzea, abiadura handiko zerbitzuek Bilbo ingurura iristeko aukera izan dezaten, hiriko behin-betiko geltokia eraikitzeko lanak egiten diren bitartean. Behin-behineko geraleku hau sarbideko tunela eta Abandoko lurrazpiko geltokia eraikitzeko lanak hasten direnean abiaraziko da.
• Basauriko behin-behineko geralekuaren eraikuntza herrian ahalik eta inpakturik txikiena eragiteko moduan egingo da, errepideko joan-etorrietan (autobusak, taxiak, ibilgailu pribatuak...) inongo intermodalitaterik sortu gabe.
• Dagozkien eskumenen barruan, eta eginkizunak betetzean ahalik eta koordinazio operatiborik handiena sustatzearren, alderdiek bi lantalde tekniko eratzeko asmoa dute, bata Abandoko geltoki berrirako (MITMA, Eusko Jaurlaritza, Bilboko Udala eta ADIFen artean), eta bestea Basauriko behin-behineko geralekurako (MITMA, Eusko Jaurlaritza, Basauriko Udala eta ADIFen artean).
• Abandoko geltokia eraikitzeko lantaldearen hasierako lana obra zibila zehaztea izango da, ADIFek proiektuak idatzi ondoren geltokiaren trenbide-ustiapenari inongo eraginik sortu gabe. Obra zibila Eusko Jaurlaritzari esleituko zaio, dagokion hitzarmenaren bitartez. Lantalde hau arduratuko da Eusko Jaurlaritzak eta ADIFek gauzatutako obren koordinazioa bermatzeaz.
• Bilboko sarbideko plataformako lanak eta trenbide-ustiapenari eraginik sorrarazten ez dioten Abandoko lurpeko geltokiko obra zibilaren lanak Garraio, Mugikortasun eta Hiri Agendako Ministerioak Eusko Jaurlaritzari egindako kudeaketa-gomendio baten bidez egingo dira.

ITURRIA: Bilboko Udala