Portugaleteko alkateorde eta EAJ-PNVko alkategaiak, Txema Ezkerrak, Portugaleteko EAJ-PNVk udal hauteskundeetara aurkeztuko duen hauteskunde programako proposamen nagusien berri eman du gaur goizean Martxoak 8 Plazan.

Txema Ezkerrak esker oneko hitzekin hasi du bere hitzaldia, azken lau urteetan bere harri-koskorra jarri duten pertsona guztientzat. Covid pandemia bezalako aurrekaririk gabeko gertakari batek markatutako aldia izan dela adierazi du. “Pandemiak hankaz gora jarri zuen gure lan egiteko, harremanak izateko, sozializatzeko eta bizitza ospatzeko modua. Baita Portugaleterako genituen plan asko ere. Baina lau urte geroago, harro itzuli gara hona egindako lanaz. Etxeko lanak eginda gatoz. Gure onena eman dugu Portugaleteren alde. Zuen laguntzari, konpromisoari eta lanari esker, gure herria duela lau urte baino indartsuago eta kohesionatuago dago, eta, horri esker, etorkizunari anbizioz eta ilusioz eta, batez ere, harrotasunez begiratzen diogu” adierazi du Ezkerrak.

Hautagaiak azpimarratu du portugaletetetarrek alderdien artean akordioak lortzeko gaitasuna balioan jartzen dutela. Beren beharrei eta arazoei erantzungo dieten akordioak, eta hor, azpimarratu du, “EAJ-PNV aurkituko dute, hor aurkituko naute, hori delako eta izango delako gure eredua, kudeaketan, hurbiltasunean, konpromisoan eta gardentasunean oinarrituta. Eredu horretan, pertsonak ditugu erdigunean, gure lehentasuna dira”.

Ezkerrak adierazi du EAJ-PNV Portugaletek Udalari haize freskoa eman diola. “40 urtez alkate sozialistak izan ondoren, ideia eta proiektu berriak behar zituen, konponbideak bilatzeko eta gure bizilagunak gehien kezkatzen dituzten gaiak mahai gainean jartzeko espazio partekatuak. Eta lortu dugu”.

EAJ-PNVk Portugaleten aurkezten duen hautagaitzaren aurkezpen ekitaldian, Itxaso Atutxa Bizkai Buru Batzarreko presidenteak ere hartu du hitza. “EAJ-PNVren politikari baten lana, entzutea eta herritarrengandik hurbil egotea da; Txema eta bere taldea horren adibide garbia izan dira. Urte hauetan guztietan erakutsi dute leialtasun eta konpromiso berarekin egon daitekeela oposizioan zein agintean, baita gutxiengoa izanda ere. Seriotasunaren adibide dira, herritarrengandik hurbil daudela eta Portugaleteren etorkizunerako proiektua dutela argi utzi digute”, ziurtatu du Bizkaiko exekutibaren buruzagi gorenak, EAJ-PNVren lidergo eta kudeaketa gaitasunari balioa emanez. Ildo horretan ziurtatu du azken lau urteotan, “Portugaleteko Udaleko gobernu kontseiluan EAJren presentziarekin, agerian geratu dela udalerria hobeto dagoela eta, bistan denez, erakundeen lana nabaritu egin dela. Euzko Alderdi Jeltzalearen estiloa nabaritu da”. Horregatik, maiatzaren 28an inor ez dadila etxean geratu eskatu du, “inor ez dadila gera gure herrientzat onena zer den erabakitzeko gaitasunik gabe. Portugaleten argi duzue; proiektu bat dago, eta izateko eta egiteko modu bat”, amaitu du.

AGINTALDIKO LAU URTEEN BALANTZEA

Egungo alkateordeak legegintzaldiko lau urteen balantzea egin du, eta EAJ-PNVk zuzendu dituen arloetan abian jarri diren ekintza ugarietako batzuk zerrendatu ditu:

-          Ekonomia sustapenera eta enplegura bideratutako aurrekontuaren % 128ko hazkundea

-          HAZTEN sortzea, ekintzailetzarako eta jarduera ekonomikorako udal-zerbitzua

-          32 irekitze berri bultzatzea eta 95 negozio modernizatzea, laguntzetan 180.000 euro baino gehiagoko inbertsioa eginez

-          423 pertsona kontratatu dira enplegu-planetan, 5 milioi euroko inbertsioarekin (aurreko legegintzaldian baino 2,2 milioi euro gehiago)

-          Meraki (gazteentzako ekipamendua) irekitzea 270.000 euroko inbertsioarekin

-          Euskara ikastearen doakotasuna, udal euskaltegian matrikularen % 100 eta homologatuetan % 80 arteko laguntzekin

-          Udaltzaingoaren bitartekoak modernizatzea, haren antolaketa-egitura hobetzea eta Ertzaintzarekiko koordinazioa hobetzea

-          Zubialdeko aparkalekuan tarifa laua aktibatzea eta San Rokeko eguneko tarifa % 60 jaistea

-          Eraikinak birgaitzeko laguntzak bultzatzeko 410.000 euro baino gehiago eman dira

PORTUGALETERAKO PROIEKTU SENDO ETA ILUSIONAGARRIA, PERTSONAK EKINTZA POLITIKOAREN ARDATZ IZANIK

Hautagai jeltzaleak bere hauteskunde-programaren ildo nagusiak azaltzeko aukera ere aprobetxatu du, eta nabarmendu du pertsonek udal-politiken erdigunean egon behar dutela. “Asko dago egiteko, eta hemen, gure, nire konpromisoa da eta EAJ-PNVko gizon eta emakume guztiena baita, batzen gaituenaren alde lan egitea, Portugaleteren alde lan egitea”.

Txemak gogorarazi duenez, EAJ-PNV Portugaletek urtebete baino gehiago darama programa prestatzen, herritarren entzute eta partaidetzarako ekimenetan, elkarte eta kolektiboekin aurrez aurre izandako topaketetan, Euskadi osoan eta baita Portugaleten aktibatutako “Entzunez Eraiki” prozesuaren bidez edo Portugaleteko kale eta auzoetatik bizilagunei entzunez garatutako “Auzoz auzo” proiektuaren bidez jasotako ekarpen eta iradokizunei esker.

“Etorkizuneko programa bat osatu dugu, Portugaleteko erronka handiei erantzuteko: enplegua, hazkunde ekonomikoa, bizi-kalitatearen hobekuntza, auzoak eta pertsonak ardatz gisa. EAJ-PNVrekin Portugaleten inor ez da atzean geratuko”

Programaren proiektu garrantzitsuenen artean, Ezkerrak honako hauek nabarmendu ditu:

-          Aparkaleku berri bat Talaian eta beste bat Repelegan

-          Irisgarritasuna hobetzea La Canilla eta Sotera de la Mier lotuko dituen igogailu batekin

-          Arrapala mekaniko berriak Buenavistako Osasun Zentrora

-          Portugaleteko Eraztun Berdea eta Atletismo Pista berria sortzea

-          Kirol Etxea irekitzea Bingo zaharreko lokaletan

-          Belaunaldien arteko Gizarte Zentro berri bat Repelegan, Buenavistan instalazio berrituekin, Family Zentrum ere hartuko duena, familiei laguntzeko gune bat

-          Florida parkea estaltzea eta Buenavistan estalpeko parke handi bat eraikitzea, aire zabaleko kirol-gune batekin

-          Hirigune historikoa biziberritzeko plana egitea

-          Itsas Antzokia sortu, Mar zinema zaharraren orubea eraldatuz. Kultur ekipamendu berri bat beheko solairuan kafe antzoki batekin eta goiko solairuetan Euskara Etxearekin, euskaltegia eta elkarte eta jardueretarako guneak hartuko dituena

Udaltzaingoaren modernizazioarekin jarraitzea, plantilla handituz eta Ertzaintzarekiko lankidetza areagotuz