EAJ-PNVk Euskadiko hautaketa-prozesu publikoetan euskara babesteko eta prozesu horiei segurtasun juridiko handiagoa emateko Lege Proposamena erroldatu du gaur goizean Eusko Legebiltzarrean. Ekimenak Lan Eskaintza Publikoen hizkuntza-eskakizunak erakunde bakoitzaren errealitatera egokitzea planteatzen du, proportzionaltasun-irizpideekin eta administrazioan euskararen erabilera normalizatzeko irizpideekin. Azken hilabeteetako euskararen biziberritze prozesuaren aurkako epai judizialek sortu duten kezka-egoeraren aurrean egin nahi da arau-aldaketa.

"Ezin gara ezer egin gabe geratu azkenaldian sententzia hauek euskararen kontrako erasoen aurrean, eta irtenbide bat eskaini behar dugu, LEP bat egiten duten pertsonei eta Administrazioan euskararen erabilerari kalte egiten dieten epaiak saihesteko. Izan ere, azkenaldian zalantzan jartzen ari dira hamarkadak ehuntzen daramatzagun adostasun oso zabal batzuk. Era berean, ezin dugu ahaztu euskal administrazioetan garatutako hizkuntza-politika integratzaileak funtsezko tresna izan direla gure hizkuntzaren biziraupenerako ", azaldu du Markel Olano EBBko Euskara arduradunak Eusko Legebiltzarrean egindako prentsaurrekoan.

Testuinguru horretan, EAJ-PNVk araudi aldaketa sustatzen du, LEPak gorabehera judizialetatik kanpo uzteko eta hizkuntza eskubideen errespetua babesten dela bermatzeko. Talde parlamentario jeltzaleak erregistratutako idazkian –ofizialki, Hizkuntza Normalizatzeko Premiazko Neurriei buruzko Lege Proposamena–, Euskal Enplegu Publikoaren Legearen 187. artikuluari beste atal bat gehitzea planteatzen da.

Praktikan, Euskal Administrazio Publiko bakoitzak azterketa zorrotz eta justifikatua egin dezala eskatuko da, proportzionaltasun-irizpideetan eta erakundean hizkuntza ofizialak erabiltzeko beharretan oinarrituta, LEPak ateratzerakoan hizkuntza-eskakizunak eta derrigortasun-datak finkatze aldera. Eta, bestalde, kendu egingo da "nahitaez bete beharreko indizeen zehaztapen orokorrak" aplikatzea, orain arte egiten zen bezala, hori izan baita epai judizialen tirabira- eta baliogabetze-puntu nagusia.

Zehazki, honako puntu hau gehitu behar zaio Legeari:

11. Euskal administrazio publikoetako erakunde bakoitzean, euskararen normalizazioari eta erabilerari buruzko plangintzarako aldi baterako tresna onartzean, eta horren barruan ezarri beharreko helburuak, neurriak eta bitartekoak ezartzean, zorroztasun osoz zehaztu beharko da hizkuntza-eskakizunaren derrigortasun-data ezarrita duten plazen ehunekoa. Erakunde bakoitzak egiten duen zehaztapena proportzionaltasun-irizpideen arabera justifikatu beharko da, erakundearen hizkuntza ofizialak erabiltzeko irizpideak kontuan hartuta. Ez da aplikatuko nahitaez bete beharreko indizeen zehaztapen orokorrik.

Enplegu publikora sartzeko deialdiek, bai eta lanpostuak betetzeko, mugitzeko eta barne-sustapeneko prozesu guztiek kontuan hartu eta aplikatuko dute Administrazio publikoan euskararen normalizazioari eta erabilerari buruzko araubide juridikoa, lege honetan ezarritakoaren arabera.

Gaur goizean erroldatutako proposamenak, gainera, berme juridiko handiena du. Gaur goizean erregistratutako proposamenak, gainera, berme juridiko handiena du, eta urte hasieratik egon dira lanean legelari adituak.